Дачка вінаватага ў аварыі на Гая: А тата жывы? Напэўна, у турму ён патрапіць назаўжды?

3-гадовы сын Эдуарда пакуль застаецца ў рэанімацыі.

Раніцай 8 лістапада ў Менску кіроўца Audi A8 пратараніў 5 аўтамабіляў, два чалавекі загінулі. Пазней стала вядома, што незадоўга да таго дома ён нанёс некалькі нажавых раненняў сваёй жонцы і двум дзецям.

- Адно дзіця, дзяўчынку, мы сёння пераводзім ў аддзяленне. Хлопчык пакуль застаецца ў рэанімацыі - думаю, яшчэ на два дні. Іх стан стабільны, жыццю нішто не пагражае. Мы вельмі спадзяемся, што ўсё будзе добра - дзецям не пагражае інваліднасць, яны будуць здаровыя, - паведаміў tut.by намеснік галоўнага лекара дзіцячай хірургіі 1 ГКБ Аляксандр Махлін.

З 8-гадовай Сафіяй 12 лістапада пачне працаваць псіхолаг. У аддзяленні з ёй, а пазней - і з 3-гадовым Стэфанам, будзе знаходзіцца бабуля, маці Вольгі. Псіхалагічны стан дзіцяці Аляксандр Махлін каментуе толькі так: «Яна ўсё разумее». Першае, што спытала Сафія, прыйшоўшы ў сябе пасля аперацыі: «Тата жывы? Напэўна, у турму ён патрапіць назаўжды?»

Дзеянні мужчыны кваліфікаваныя паводле ч. 1 арт. 14 і ч. 2 арт. 139 (Замах на забойства, учыненае пры абцяжарваючых абставінах), ч. 3 арт. 317 (Парушэнне правілаў дарожнага руху, што пацягнула праз неасцярожнасць смерць двух асоб) КК РБ. 38-гадоваму мужчыну пагражае смяротнае пакаранне - у выпадку, калі ён будзе прызнаны ў стане свядомасці. Прызначаная псіхіятрычная экспертыза.