Сяргей Рутэнка намінаваны на званне лепшага левага паўсярэдняга свету

Капітан зборнай Беларусі ўключаны ў лік намінантаў на званне лепшага левага паўсярэдняга свету паводле вынікаў 2014 года.

Канкурэнты беларуса ў абвешчаным для наведвальнікаў партала галасаванні - датчанін Мікель Хансен, серб Мамір Іліч і чэх Філіп Іха. Галасаванне праводзіцца папулярным інтэрнэт-парталам Handball-Planet.com.

Конкурс праходзіць яшчэ ў сямі намінацыях, а заадно вызначаецца і лепшы гандбаліст свету. Квартэты прэтэндэнтаў складзеныя паводле вынікаў выбару журы, куды ўвайшлі гандбольныя журналісты 23 краін трох кантынентаў. З дзяржаў постсавецкай прасторы ў ім прадстаўленая толькі Беларусь у асобе Сяргея Новікава з "Прессбола". Меркаванне журналістаў стане дамінуючым, а абагульнены голас заўзятараў будзе дададзены да яго з паніжальным каэфіцыентам.