У кастрычніку ў Менску больш за ўсё падаражэлі каўбаса і бензін

У кастрычніку 2014 года ў Менску кошты на харчовыя тавары выраслі на 1,1% у параўнанні з вераснем і на 19,3% - з пачатку года.

Пра гэта паведамілі ў галоўным статыстычным упраўленні сталіцы.

Больш за ўсё падаражэлі: агародніна - на 33,4%; яйкі - на 4,4%; каўбасныя вырабы і вэнджаніна - на 2,7%; сыры - на 2,3%; мука пшанічная - на 2,1%, гарбата - на 1,5%; макаронныя вырабы - на 1,2%, паведамляе БелаПАН.

На шэраг прадуктаў кошты знізіліся. На рыбу і морапрадукты і масла - на 0,2%; цукар - на 0,4%; алкагольныя напоі - на 0,6%: бульбу - на 2,9%; садавіну - на 5,9%.

Кошты на нехарчовыя тавары ў кастрычніку ў параўнанні з вераснем выраслі на 0,9%, з пачаткам года - на 9%. Больш за ўсё падаражэлі ў кастрычніку: бензін - на 5%; медыкаменты - на 2,9%; пісьмовыя прылады - на 2,5%; посуд і сталовыя прыборы - на 1,7%.

Знізіліся на 0,6% кошты на бытавыя электрапрыборы і 0,01% - дываны і дывановыя вырабы.

Платныя паслугі насельніцтву ў кастрычніку ў параўнанні з вераснем падаражэлі на 2,3%, з пачаткам года - на 22,7%. Больш за ўсё кошты выраслі на жыллёва-камунальныя паслугі - на 6,9%, у тым ліку на электразабеспячэнне - на 11,5%, газазабеспячэнне - на 8,1%, водазабеспячэнне - на 3,5%, тэхабслугоўванне жылых памяшканняў - на 9 , 8%. Падаражэлі паслугі сувязі на 1,9%, медыцынскія паслугі - на 2,6%, культуры - на 2,4%, паслугі канцэртных арганізацый - на 5,7%, бытавыя - на 1,3%.

Знізіліся на 3,5% тарыфы на паслугі авіятранспарту. Чыгуначныя пасажырскія перавозкі міжнародных стасункаў патаннелі на 9,8%, санаторна-аздараўленчыя паслугі - на 1,4%.