У Мытным саюзе не будзе «лёгкіх» цыгарэт

Рада Еўразійскай эканамічнай камісіі (ЕЭК) узгадніла тэхнічны рэгламент Мытнага саюза на тытунёвую прадукцыю.

Пра гэта паведамілі ў Мінсельгасе Расеі.

Тэхрэгламент распрацаваны федэральным аграрным ведамствам і ўстанаўлівае абавязковыя патрабаванні да тытунёвай прадукцыі, інфармацыі, якая наносіцца на спажывецкую ўпакоўку, а таксама формы, схемы і працэдуры ацэнкі адпаведнасці, паведамляе БелТА.

Напрыклад, патрабуецца абавязковае нанясенне на ўпакоўку інфармацыі аб утрыманні ў тытунёвым вырабе сістэмных ядаў, канцэрагенных і мутагенных рэчываў. «Дадзеныя звесткі не павінныя ўтрымліваць любы тэрмiн, апісанне, сімвалічны ці іншы знак, якія проста ці ўскосна ствараюць ілжывае ўражанне аб тым, што пэўны тытунёвы выраб з'яўляецца менш шкодным, чым іншыя. У тым ліку словы ці словазлучэнні: «з нізкім утрыманнем смол», «лёгкія», «вельмі лёгкія», «мяккія», «экстра», «ультра», - адзначылі ў Мінсельгасе.

Згодна з тэхрэгламентам, не дапускаецца нанясенне на спажывецкую ўпакоўку колькасных паказчыкаў утрымання смалы, нікаціну і монааксіду вугляроду ў дыме, а таксама інфармацыі аб тым, што спажыванне гэтага тытунёвага вырабу зніжае рызыку ўзнікнення захворванняў.

Акрамя таго, папярэджанне пра шкоду спажывання тытунёвых вырабаў павіннае размяшчацца пераважна на верхнім пярэднім і зваротным баках упакоўкі і займаць не менш за 50% плошчы асноўных бакоў.

Пры рэалізацыі не дапускаецца выкарыстанне лістоў-укладышаў, размешчаных ўнутры, прымацаваных звонку або прыкладзеных да спажывецкай упакоўцы, за выключэннем той, на якую немагчыма нанесці інфармацыю для спажыўца, а таксама пры рэалізацыі цыгар і цыгарыл паштучна.