Audi прыдумала, як атрымліваць дызпаліва з паветра

Кампанія Audi прэзентавала тэхналогію атрымання прыдатнага для выкарыстання дызельнага паліва з паветра і вады.

Прылада, якая ажыццяўляе такую аперацыю, устаноўленая на эксперыментальным прадпрыемстве нямецкага аўтавытворцы ў Дрэздэне, паведамляе motor.ru.

Вуглякіслы газ завод атрымлівае дзякуючы тэхналогіі прамога захопу паветра, якая прэзентаваная партнёрам праекта - фірмай Climeworks. Далей ажыццяўляецца электроліз вады, у выніку чаго атрымліваюцца кісларод і вадарод. Апошні ўступае ў хімічную рэакцыю з двухвокісам вугляроду пры тэмпературы ў 220 градусаў Цэльсія пад ціскам 25 бар. На выхадзе атрымліваецца вадкае рэчыва, якое называецца Blue Crude.

У далейшым вадкасць перапрацоўваецца ў сінтэтычны дызель без серы і араматычных вуглевадародаў і з высокім цэтанавым лікам. Для запраўкі аўтамабіляў паліва можна змяшаць з вырабленым са здабытай традыцыйным спосабам нафты ў практычна любой прапорцыі.

На сённяшні дзень завод Audi у Дрэздэне здольны вырабляць каля 160 літраў Blue Crude у дзень. З іх 80 працэнтаў (каля 128 літраў) могуць быць перапрацаваныя ў сінтэтычны дызель.

Раней кампанія Audi прэзентавала тэхналогію атрымання газу e-gas. Яна таксама прадугледжвае выкарыстанне атрыманага падчас электролізу вады вадароду і двухвокісу вугляроду. У гэтым выпадку ў выніку рэакцыі рэчываў атрымліваецца сінтэтычны метан, якім можна запраўляць аўтамабілі, якія працуюць на газе. Напрыклад, хэтчбек Audi A3 g-tron, які быў прэзентаваны вясной 2013 года.