Паліцыя Італіі зняла рытуал пасвячэння ў мафіёзі

У Італіі паліцыя ўпершыню апублікавала кадры рытуалу пасвячэння ў мафіёзі.

Яны былі таемна знятыя падчас расследавання злачынстваў крымінальнага сіндыката ндрангета, паведамляе BBC.

У поле зроку праваахоўных органаў патрапілі тры злачынныя групоўкі, якія дзейнічалі ў правінцыях Кома і Лека ў рэгіёне Ламбардыя. Большая частка арыштаў была праведзеная на поўначы Італіі, аднак некалькі чалавек былі затрыманыя на Сіцыліі.

Спецыяльныя падраздзяленні італійскай паліцыі ў барацьбе з арганізаванай злачыннасцю падчас рэйдаў на поўначы краіны арыштавалі прынамсі 40 чалавек.

Арыштаваных падазраюць у дачыненні да ндрангеты - мафіёзнага сіндыкату з Калабрыі, беднага рэгіёну на поўдні Італіі.

Нягледзячы на тое, што ндрангета менш вядомая, чым сіцыліянская каза ностра або неапалітанская камора, яна ўважаецца за адну з самых багатых і магутных злачынных арганізацый у свеце.

"Апошні патрон для сябе"

У ндрангеце прынятыя складаныя рытуалы прысвячэння, эліта групоўкі называецца "Санта".

Менавіта цырымонію пасвячэння ў мафіёзную эліту ўдалося таемна зафатаграфаваць паліцыянтам на поўначы Італіі.

Падчас цырымоніі новыя чальцы мафіёзнага сіндыката пакляліся "абараняць гонар сваіх мудрых братоў".

Паліцыянтам удалося зафатаграфаваць цырымонію пасвячэння ў мафіёзную эліту

"На той выпадак, калі вы, грэбуючы асцярожнасцю, здзейсніце неабдуманы ўчынак, існуе таблетка цыяністага калію", - кажа на відэазапісе мафіозі, які праводзіць абрад. Ён заклікае новых чальцоў групоўкі заўсёды мець пад рукой яд або ж "пакідаць апошні патрон для сябе".

Аднаму з прысвечаных, са слоў паліцыі, было ўсяго 17 гадоў.

Арыштаваным мафіёзі выстаўленыя абвінавачванні ва ўдзеле ў злачыннай групоўцы, вымагальніцтве і незаконным нашэнні зброі.

Са слоў пракурора Ільды Бакасіні, якая ўзначальвала расследаванне, відэазапіс паказвае, як "сіла традыцый" дапамагае ндрангеце выжываць.