У берасцейскай гімназіі ў школьнікаў скануюць адбіткі пальцаў

У школьнікаў брэсцкай гімназіі №4 пачалі сканаваць адбіткі пальцаў для новай прапускной сістэмы.

Берасцейка Ала паведаміла, што ў берасцейскай гімназіі №4, дзе вучацца трое яе дзяцей, у школьнікаў пачалі сканаваць адбіткі пальцаў для новай прапускной сістэмы, устаноўленай на ўваходзе. У адміністрацыі запэўніваюць, што падставы для турботы няма, а новаўвядзенне дазволіць абмежаваць доступ у навучальную ўстанову непажаданых асоб, піша Tut.by.

Аб ўстаноўцы сістэмы Ала даведалася ад свайго сына-старшакласніка.

"У канцы мінулага тыдня старэйшы сын прыйшоў са школы і сказаў, што ім адсканавалі пальцы. Я першапачаткова не надала гэтаму значэння. Потым я прыйшла на бацькоўскі сход да малодшага сына. І там паднялі гэтае пытанне. Ніхто тады не ведаў, што гэта такое. адзін тата, які ў пракуратуры працуе, адразу абурыўся тым, што ў дзяцей сканавалі пальцы без дазволу бацькоў", - распавяла суразмоўца.

Абураная жанчына звярнулася ў адміністрацыю гімназіі:

"Дырэктар мне сказала, што адбіткі майго сына будуць выдаленыя, раз я супраць гэтага. Я не ведаю, якая зараз сітуацыя, але вельмі шмат якім дзеткам адсканавалі пальчыкі. Я ведаю, што ў адным першым класе класны кіраўнік сказала, што без дазволу бацькоў яна нічога рабіць не дасць. <...> Я з'яўляюся старшынёй бацькоўскага камітэта ў адным з класаў і знаходжуся ў апякунскай радзе школы. гэтае пытанне не выносілася на галасаванне. Нам сказалі, што гэта ўводзіцца дзеля бяспекі дзяцей. Але сам падыход да вырашэння праблемы мне незразумелы".

20 нязгодных з укараненнем сістэмы бацькоў напісалі калектыўны ліст старшыні Берасцейскага гарвыканкама. Акрамя таго, быў накіраваны адпаведны зварот у пракуратуру горада.

Бяспека

На ўваходзе ў гімназію №4 турнікетная пара ўжо ўстаноўленая. Пры гэтым канструкцыя сустракае школьнікаў толькі каля адной дзверы, суседні праход вольны.

Як растлумачылі ў навучальнай установе, устаноўка турнікетаў была папярэдне ўзгодненая з усімі зацікаўленымі ведамствамі. Акрамя таго, гэтай тэме будуць прысвечаныя два маючыя адбыцца бацькоўскія сходы.

Дырэктар ДУА "Гімназія №4 г. Берасця" Алена Шкулепа патлумачыла, што турнікетная сістэма ўводзіцца ў першую чаргу для ўзмацнення мер бяспекі.

"Цяпер востра стаіць пытанне аб устаноўцы ва ўстановах адукацыі кантрольна-прапускнога рэжыму. Усе ўстановы адукацыі маюць сістэмы відэаназірання. Мы вырашылі ўстанавіць турнікетную сістэму, якая ў тым ліку абмяжуе праход у будынак гімназіі пабочным асобам. Сістэма таксама дасць магчымасць дысцыплінаваць навучэнцаў, таму што дазволіць адсочваць і выяўляць тых, хто пастаянна спазняецца. Акрамя таго, мы зможам выяўляць тых, хто рэгулярна выходзіць на перапынках на вуліцу. Пры жаданні гэтая сістэма таксама дазволіць бацькам кантраляваць час прыходу і сыходу са школы іх дзяцей праз СМС-абвесткі. Арганізацыя прапускнога рэжыму - адзін з найважнейшых момантаў забеспячэння бяспекі ва ўстановах, дзе вучацца дзеці", - распавяла дырэктар гімназіі.

Паводле словах суразмоўніцы, цяпер адбіткі пальцаў скануюць у дзяцей толькі з пісьмовага дазволу бацькоў. Калі мама з татам не згодныя, ім прапануецца набыць для дзіцяці пластыкавую картку коштам 20 тысяч беларускіх рублёў. Пры страце новы "пропуск" абыдзецца ўжо ў 50 тысяч беларускіх рублёў.