Лукашэнка: Што гэта за паводзіны такія?
81- 27.11.2014, 12:24
- 81,590
Дыктатар заяўляе аб тым, што прыгнечаны пазіцыяй расейскіх уладаў, якія абмяжоўваюць пастаўкі беларускай прадукцыі ў РФ.
- Мяне сёння паводзіны расейскіх уладаў не проста здзіўляюць, а гнятуць. Калі бліжэйшым часам не будзе нармалізаваная гандаль паміж дзвюма краінамі, мы вымушаныя будзем рэагаваць. Што гэта за паводзіны такія?! - заявіў Лукашэнка, сустракаючыся ў чацвер у Менску з губернатарам Санкт-Пецярбурга Георгіем Палтаўчанкам, паведамляе «Інтэрфакс».
Нагадаем, Расея забараніла практычна ўвесь імпарт мяса з Беларусі.
Рассельгаснагляд заяўляе аб неадпаведнасці беларускіх прадуктаў нормам і патрабаванням заканадаўства Расеі і Мытнага саюза. Паводле звестак установы, у беларускім мясе прысутнічаюць шкодныя мікраарганізмы і антыбіётыкі. З серады забаронены ўвоз прадуктаў вытворчасці ААТ «Агракамбінат Скідзельскі», ААТ «Віцебская бройлерная птушкафабрыка», СЗАТ «Сервалюкс Агра», ААТ «Віцебскі мясакамбінат», ААТ «Жлобінскі мясакамбінат», ААТ «Калінкавіцкі мясакамбінат», ААТ «Рагачоўскага МКК» і ААТ «Птушкафабрыка «Рассвет».