Еўрапейскія журналісты паўтарылі фотасесію віцяблян

Журналісты ў Брусэлі ў знак салідарнасці паўтарылі фотасесію сваіх калегаў з Віцебска, якіх збіраюцца судзіць.

Пра гэта сайту charter97.org паведамілі ў прэс-службе Беларускай асацыяцыі журналістаў.

26 лістапада група сябраў Еўрапейскай федэрацыі журналістаў сфатаграфавалася з такімі ж папяровымі клеткамі і птушкамі, якія трымалі ў руках жыхары Віцебска падчас фотасесіі «Станем за журналістыку». Удзельнікі брусэльскай фотасесіі трымалі ў руках таблічкі з пытаннем «Хіба гэта злачынства?».

«Гэта зроблена для таго, каб паказаць недарэчнасць міліцэйскіх абвінавачванняў», - гаворыцца ў прэс-рэлізе на сайце Еўрапейскай федэрацыі журналістаў. Арганізацыя нагадвае таксама аб сумесным лісце ГА «БАЖ» і ЕФЖ да віцебскіх уладаў з заклікам адмяніць выстаўленыя журналістам абвінавачванні.