Менскае «Дынама» можа ўзначаліць Юры Максімаў

Па заканчэнні сезона Уладзіміра Жураўля на пасадзе галоўнага трэнера менскага "Дынама" можа змяніць Юры Максімаў.

У каментары pressball.by настаўнік, які ў 2005 годзе ўжо працаваў у менскім клубе другім трэнерам пры Аляксандру Рабаконю, пацвердзіў, што пагадзіўся ўзначаліць "бела-блакітных".

- Так, я сустракаўся з Юрыем Аляксандравічам Чыжом. Гэта былі папярэднія перамовы.

- Але вы далі згоду ўзначаліць "Дынама"?

- Я ўжо даўно даў згоду. Вось прыеду ў снежні - і, напэўна, усё падпішам канкрэтна.

Пасля завяршэння гульнявой кар'еры менскае "Дынама" стала першым месцам працы Юрыя Максімава ў іпастасі трэнера - у свой штаб яго ўключыў Аляксандр Рабаконь. Пасля вопыту працы ў беларускім клубе настаўнік адправіўся ў самастойнае плаванне. Ён узначальваў кіеўскі ЦСКА (2006), "Абалонь" (2008-2009), "Крыўбас" (2010-2012), данецкі "Металург" (2012-2013) і "Мардовію" (2013-2014).