Маці пакаранага Аляксандра Грунова: «Жывёлы ...» (Відэа)

Маці асуджанага да смяротнага пакарання Аляксандра Грунова атрымала на пошце кардонныя скрынкі з адзеннем сына, у якім ён знаходзіўся ў камеры смяротнікаў у менскай турме на вуліцы Валадарскага.

13 кастрычнік Вольга Грунова была на спатканні ў турме, а 29 кастрычніка нехта Пятровіч В.У. даслаў ёй у Гомель з менскага паштовага аддзялення №115 тры кардонныя скрынкі. Адрас адпраўніка не абазначаны, напісана толькі: «да запатрабавання», паведамляе БелаПАН.

У скрынках акрамя звычайнага адзення ляжала і турэмная роба з намаляваным белым колам, пасярэдзіне якога - літары «ИМН». Усё гэта і паказвае з плачам Вольга Грунова, якую раз-пораз перабівае не зусім цвярозая сяброўка Валянціна.

Маці выцягвае з кучы адзення турэмную адзежу сына і цяпер ужо жорстка лае тых, хто даслаў ёй адзене:

«Яны, жывёлы, сунулі тое, у чым ён знаходзіўся там, і мне кінулі. Яно мне наогул не трэба. Я яму не дасылала такога. Ён хадзіў у мяне ў лепшым. Гэта не яго, гэта іх. Жывёлы, каб іх пранцы зжэрлі... Вось, можаце сфатаграфаваць».

Вольга Грунова яшчэ ўчора хацела ісці ў царкву, каб паставіць свечку і замовіць памінальную малітву. Але няма сіл. Да таго ж мяркуе так: калі меркаваць, што Аляксандра не стала 29 кастрычніка, то дзевяты, памінальны, дзень будзе толькі сёння.

На думку праваабаронцаў, сам факт, што маці атрымала асабістыя рэчы сына, хутчэй за ўсё азначае, што Аляксандра Грунова ўжо расстралялі - у перыяд паміж 13 і 29 кастрычнікам. Такая практыка склалася ў сістэме выканання пакаранняў Беларусі: рэчы асуджанага да расстрэлу адсылаюць родным пасля таго, як прысуд выкананы.

Афіцыйнага паведамлення пра смяротнае пакаранне сына Вольга Грунова пакуль не атрымала. Не выдаюць у Беларусі родным і блізкім і цела расстралянага, а месца ягонага пахавання трымаецца ў сакрэце.

Пакуль Аляксандр Груня знаходзіўся ў турме, гомельскі праваабаронца Леанід Судаленка, які, як і многія іншыя актывісты, выступае за мараторый на смяротнае пакаранне, накіраваў па даверанасці Грунова ў Камітэт ААН правоў чалавека ягоную індывідуальную скаргу - на шматлікія парушэнні падчас правядзення следства ў справе забойства студэнткі Наталлі Емельянчыкавай.

«Камітэт ААН зарэгістраваў гэтую скаргу і ў той жа дзень накіраваў ураду Беларусі просьбу не выконваць смяротны прысуд да таго часу, пакуль скарга не будзе разгледжаная. На жаль, мы бачым, што ўрад зноў праігнаравала свае міжнародныя абавязанні», - адзначыў Леанід Судаленка.

Нагадаем, Гомельскі абласны суд двойчы выносіў прысуд аб вышэйшай меры пакарання ў дачыненні да Аляксандра Грунова за асабліва жорсткае забойства студэнткі Наталлі Емельянчыкавай. Сваёй ахвяры забойца нанёс больш за сотню нажавых раненняў. Першы прысуд Грунову быў скасаваны Вярхоўным судом з прычыны працэдурных парушэнняў.