Хакейную нацыянальную каманду Беларусі ўзначаліць Дэйв Льюіс
5- 10.12.2014, 15:16
- 8,676
Спецыяліст неўзабаве прыбудзе ў Менск для ўзгаднення кантракту.
Асацыяцыя «Федэрацыя хакея Рэспублікі Беларусь» паведамляе, што асноўным кандыдатам на пасаду галоўнага трэнера нацыянальнай каманды Беларусі ў хакеі з'яўляецца Дэйв Льюіс.
Раней 61-гадовы спецыяліст уваходзіў у трэнерскі штаб шэрагу клубаў НХЛ: «Дэтройт Рэд Уінгз» (1987-2006 гг.), «Бостан Бруінз» (2006-2007 гг.), «Лос-Анджэлес Кінгз» (2007-2008 гг. ), «Караліна Харыкейнз» (2011-2014 гг.). Разам з «Крыламі» Льюіс тройчы станавіўся ўладальнікам Кубка Стэнлі (1997, 1998, 2002).
У якасці абаронцы Льюіс правёў у НХЛ больш за 1000 матчаў, выступаючы за «Нью-Ёрк Айлэндэрз», «Лос-Анджэлес Кінгз», «Нью-Джэрсі Дэвілс» і «Дэтройт Рэд Уінгз».
Раней настаўнік ужо працаваў у трэнерскім штабе нацыянальнай каманды Рэспублікі Беларусь. У 2009 Льюіс быў асістэнтам Глена Хэнлана на Чэмпіянаце свету ў Швейцарыі, у 2010 дапамагаў Міхаілу Захараву на Алімпійскіх Гульнях у Ванкуверы.
Працэдура падпісання кантракту, а таксама прэс-канферэнцыя з удзелам Дэйва Льюіса запланаваныя на панядзелак 15 снежня ў штаб-кватэры Нацыянальнага алімпійскага камітэта, размешчанага па адрасе г. Менск, вул. Вясёлкавая, 27. Час пачатку прэс-канферэнцыі - 11:00.