Расейска-беларускія холдынгі звальняюць сваіх супрацоўнікаў

Некаторыя буйныя расейска-беларускія холдынгі практычна цалкам прыпынілі набор супрацоўнікаў і звальняюць старых.

Пра гэта аглядальніку "Інтэрфакса" распавяла дырэктарка кадравага агенцтва "Квадрат" Святлана Карасцялёва.

"У расейска-беларускіх холдынгах ануляваны бюджэт на падбор персаналу і скасаваныя ўсе заяўкі. Назіраюцца значныя скарачэнні спецыялістаў "топавага "ўзроўню", - адзначае Святлана.

Дырэктарка кадравага агенцтва распавядае, што, маючы досвед працы ва ўмовах крызісу, кампаніі, якія вядуць сваю дзейнасць на тэрыторыі Беларусі, склалі спіс супрацоўнікаў, якія не будуць звольненыя ні пры якіх абставінах.

"Спецыялісты, на якіх трымаецца кампанія, застануцца. Што тычыцца работнікаў, якіх больш-менш лёгка можна замяніць, іх ужо пачалі звальняць", - адзначылі ў агенцтве.

Са слоў экспэрта, працадаўцы спадзяюцца: як толькі сітуацыя стабілізуецца, звольненыя супрацоўнікі зноў вернуцца ў кампанію.

Акрамя таго, шэраг буйных расейска-беларускіх холдынгаў адпраўляе супрацоўнікаў на некалькі дзён у адпачынак за свой кошт, адзначае Святлана Карасцялёва.

"Такія меры прымаюцца для таго, каб як мага даўжэй пратрымаць супрацоўнікаў у кампаніі. Але фінансавыя магчымасці арганізацый не бязмежныя", - адзначае дырэктарка кадравага агенцтва.

Са слоў Святланы, калі сітуацыя не стабілізуецца, адпачываць за свае сродкі супрацоўнікі холдынгаў будуць не 1-5 дзён, а два тыдні ў месяц.