Лукашэнка: Невядома, што заўтра з далярам будзе

Дыктатар просіць беларусаў не скупляць валюту.

Пра гэта Аляксандр Лукашэнка заявіў, прымаючы з дакладамі памочнікаў прэзідэнта ў Віцебскай і Гарадзенскай абласцях Мікалая Шэрстнява і Уладзіміра Даманеўскага, паведамляе прэс-служба дыктатара.

Лукашэнка пачаў размову з сітуацыі, якая складваецца ў беларускай эканоміцы, і ўплывае, у тым ліку на валютны рынак. Будучы занепакоенымі абясцэньваннем беларускага рубля, грамадзяне імкнуцца хутчэй яго кудысьці ўкласці, купляючы розныя тавары. Дыктатара здзіўляе, чаму людзі аддаюць перавагу імпарту ў тых групах тавараў, якія вырабляюцца ў Беларусі.

«Імпарт - ён адносна, можа быць, прыкладна супастаўны, хоць даражэйшы, але супастаўны з нашымі тэлевізарамі, пральнымі машынамі або ЗВЧ-печамі. Але калі заўтра, не дай бог, гэтая тэхніка выйдзе з ладу, то яны ў 10 разоў даражэй заплацяць. Яшчэ і па тэрмінах, пакуль адрамантуюць, будуць праблемы, - падкрэсліў Аляксандр Лукашэнка. - Гэта справа людзей: купляюць - няхай купляюць. Я сёння аддаў распараджэнне, асабліва ў Менску, каб мы ні ў якім разе не стрымлівалі тавар па імпарту і каб на гэтым імпарце па-ранейшаму пасярэднікі і гандлёвыя працаўнікі не нажываліся».

Дыктатар падзяліўся сваім прагнозам з нагоды амерыканскай валюты.

«Што тычыцца валютнага рынку, людзі ўжо зразумелі, што нельга такую высокую цану плаціць за даляры і еўра. І гэта правільна. У рэшце рэшт, сапраўды лепш купіць нейкі тавар, чым купляць даляр. Невядома, заўтра што з ім будзе», - дадаў ён.

Лукашэнку цікавіла, як у сувязі з новаўвядзеннямі ўрада і Нацбанку складваецца сітуацыя ў Віцебскай і Гарадзенскай абласцях. «Я паслухаю і іншых памочнікаў, каб прадстаўляць карціну не толькі з вуснаў губернатараў, але і з вашых вуснаў, якая сітуацыя на месцах. А яна ж не такая, як у Менску. Гэта ў Менску могуць бегаць, гвалтам крычаць, а на месцах можа быць іншая сітуацыя. Якая яна?» - Сказаў беларускі дыктатар.