Прэм'ера скандальнага «Інтэрв'ю» сабрала ў ЗША $1 мільён
8- 26.12.2014, 21:02
- 13,668
Фільм пра забойства паўночнакарэйскага дыктатара б'е рэкорды праглядаў.
Нашумелая амерыканская кінакамедыя "Інтэрв'ю" пра замах на лідара КНДР Кім Чэн Ына, якая выйшла ў Каляды ў абмежаваны кінапракат у ЗША, сабрала $1 млн у 300 незалежных кінатэатрах, якія адважыліся яе паказаць, паведамляе "Інтерфакс" са спасылкай на агенцтва Bloomberg.
Паводле ацэнак экспертаў, "Інтэрв'ю" каштавала вытворцу - кінастудыі Sony Pictures - амаль $80 млн.
Зборы іншай каляднай прэм'еры - казкі Walt Disney Co. "Чым далей у лес..." (Into the Woods) - склалі $15,1 млн, аднак яе дэманстравалі амаль 2,5 тыс. кінатэатраў.
"Інтэрв'ю" таксама паказваюць на відэахостынгу YouTube, платформах Google Play і Microsoft's Xbox Video, дзе ён узначальвае самыя свежыя рэйтынгі. Аднак з'яўленне электроннай версіі хутка зрабіла фільм мішэнню інтэрнэт-піратаў. Паводле звестак вэб-сайта Torrent Freak, незаконным чынам камедыю спампавалі больш за 750 тыс. з моманту выкладкі файла.
Sony не пракаментавала паведамленні аб дзейнасці піратаў і пакуль не апублікавала ніякіх планаў аб прасоўванні "Інтэрв'ю" за межамі ЗША.
Фільм раней выклікаў рэзкую рэакцыю ў Пхеньяне, які расцаніў яго як абразу паўночнакарэйскага кіраўніка. За гэтым рушылі ўслед хакерскія атакі на сайты Sony Pictures, у якіх Вашынгтон афіцыйна абвінаваціў Паўночную Карэю, а таксама пагрозы тэрактаў у кінатэатрах, якія будуць дэманстраваць фільм.
Пасля гэтага Sony Pictures абвясціла аб скасаванні пракату фільма, але дзякуючы масавай падтрымцы, у тым ліку з боку прэзідэнта ЗША Барака Абамы, пракат фільма адбыўся.
Прадстаўнік Паўночнай Карэі ў ААН заявіў, што КНДР асудзіць дэманстрацыю гэтага фільма, але, хутчэй за ўсё, устрымаецца ад "фізічнай рэакцыі".