Прадпрыемствы спыняюць працу праз сітуацыю на валютным рынку

Да ўрэгулявання сітуацыі на валютным рынку многія беларускія прадпрыемствы збіраюцца прыпыніць працу.

Такія вынікі экспрэс-апытання прадпрыемстваў, паведаміла БелаПАН дырэктарка Бізнэс-саюза прадпрымальнікаў і наймальнікаў ім. прафесара Куняўскага Жанна Тарасевіч.

"Большасць прадпрыемстваў, згодна з нашым апытаннем, маюць намер прыпыніць свой бізнэс, скараціць пастаўкі альбо прыпыніць продаж, бо незразумела, што будзе далей", - адзначыла Жанна Тарасевіч.

Акрамя таго, як сведчаць вынікі апытання, у сувязі з сітуацыяй на валютным рынку суб'екты гаспадарання маюць намер аптымізаваць колькасць персаналу, паведаміла кіраўнік бізнэс-саюза.

"Прадпрыемствы маюць намер часткова скараціць супрацоўнікаў, каб выплачваць годны заробак астатнім работнікам. Існуюць і такія суб'екты гаспадарання, якія, у сувязі з сітуацыяй, што склалася, маюць намер дыверсіфікаваць свой бізнэс", - паведаміла дырэктар бізнэс-саюза.

Яна выказала надзею на тое, што ў канчатковым выніку ўрад знойдзе развязанне, якое ўрэгулюе сітуацыю на валютным рынку і дасць магчымасць прадпрыемствам вярнуцца да нармальнай працы. "Я спадзяюся, урад і бізнэс-супольнасць сумесна выпрацуюць развязанне, якое будзе прымальнае для нас усіх", - падкрэсліла Тарасевіч.

Нагадаем, шэсць беларускіх бізнэс-саюзаў на мінулым тыдні накіравалі ў органы дзяржкіравання, у тым ліку ў адміністрацыю Лукашэнкі, ліст у сувязі з сітуацыяй на валютным рынку.

У ім адзначаецца, што пасля ўвядзення 30-адсоткавага падатку на біржавыя аперацыі ў набыцці замежнай валюты і павелічэння нормы абавязковага продажу валютнай выручкі з 30% да 50% "рэзка змяніліся ўмовы гаспадарчай дзейнасці для пераважнай большасці камерцыйных арганізацый". Згодна з ацэнак бізнэс-саюзаў, практычна ўсе прадпрыемствы ставяцца да прынятай на валютным рынку пастановы адмоўна.

Кіраўнікі беларускіх бізнэс-саюзаў звярталі ўвагу на тое, што 30-адсоткавы збор пры набыцці замежнай валюты прадпрыемствы паводле дзейсным заканадаўстве павінны выплачваць за кошт чыстага прыбытку. "Гэты збор даводзіцца выплачваць ізуверскім спосабам", - заявіў сустаршыня Рэспубліканскай канфедэрацыі прадпрымальніцтва Віктар Маргелаў.