Францыя адмаўляецца ад «падатку на багацце»
11- 29.12.2014, 19:10
- 20,567
З 1 студзеня 2015 Францыя адмаўляецца ад падатку на багацце ў 75% ад даходаў.
Пра гэта заявіў прэм'ер-міністр Францыі Мануэль Вальс, піша La Tribune.
Падатак стаў адным з самых высокіх у свеце. Менавіта ўвядзенне 75-працэнтнага падатку стала прычынай таго, што вядомы акцёр Жэрар Дэпардзье адмовіўся ад французскага грамадзянства.
Новаўвядзенне было анансаванае яшчэ ў 2012 годзе Франсуа Аландам і з'яўлялася адным з самых гучных абяцанняў ягонай прэзідэнцкай кампаніі. Пасля ўступлення ў сілу ў канцы 2013 года яно выклікала шмат шуму ў грамадстве і неаднаразова падвяргалася крытыцы.
Мера, закліканая павысіць паступленні ў бюджэт, прынесла больш шкоды, чым карысці, бо праз яе адток замежных інвестыцый з Францыі дасягнуў небывалых памераў.
Паводле звестак Міністэрства фінансаў, у 2014 годзе падатак прынясе дзяржаве 260 млн еўра. У 2015-м сума склала б толькі 160 млн еўра. У параўнанні з агульным прыбыткам ад звычайнага падаходнага падатку - 70 млрд еўра, гэта зусім нязначная лічба. А вось давер замежных інвестараў падарваны, і аднаўляць яго прыйдзецца не адзін год, лічаць эканамісты.
У той жа час урад Францыі вырашыў увесці новы падатак на нерухомасць з 2015 года. У прыватнасці, уладальнікаў нерухомасці, у тым ліку і замежнікаў, хто мае два і больш жылля, неўзабаве могуць абавязаць плаціць падатак на 20% вышэй за дзейны.