Кубінская дысідэнтка заявіла пра арышты апазіцыянераў

Вядомая на Кубе блогерка-дысідэнтка Ёані Санчэс паведаміла, што паліцыя арыштавала яе мужа і яшчэ аднаго апазіцыйнага актывіста.

З яе слоў, Рэйналда Эскабар і Эльесэр Авіла былі змешчаныя пад варту незадоўга да запланаванай акцыі пратэсту на плошчы Рэвалюцыі ў Гаване, паведамляе BBC.

Арганізатары заяўлялі, што мелі намер праверыць рэакцыю ўладаў на няўзгодненую дэманстрацыю.

Раней у снежні ЗША і Куба абвясцілі аб аднаўленні стасункаў паміж краінамі.

Прэзідэнт Барак Абама тады заявіў, што кубінцы не павінны цярпець пераслед за свае погляды.

Кубінскія ўлады назвалі акцыю, што рыхтуецца, палітычнай правакацыяй.