«Палатка» рыхтуецца павялічыць падатак на аўто

Стала вядома, колькі кіроўцам прыйдзецца заплаціць за пошліну на аўто.

У Беларусі плануецца павялічыць стаўкі транспартнай дзяржпошліны. Гэта прадугледжана папраўкамі ў Падатковы кодэкс, паведамляе БелТА.

Для ўладальнікаў легкавых аўтамабіляў дзяржпошліну плануецца павысіць у сярэднім на адну базавую велічыню (1 БВ цяпер складае Br150 тыс). Так, за легкавушку масай больш за 1,5 т, але не больш за 2 т, магчыма, прыйдзецца плаціць шэсць базавых, а не пяць, як цяпер. За аўтамабіль масай больш за 2 т, але не больш за 3 т - восем базавых велічынь замест цяперашніх сямі, масай больш за 3 т - 11 БВ (зараз 10 базавых). Павялічыць дзяржпошліну плануецца і за прычэпы, грузавыя аўтамабілі і г.д.

Што тычыцца арганізацый, то ім, згодна з законапраектам, налета трэба будзе плаціць у сярэднім на 2 базавыя велічыні больш за допуск да ўдзелу ў руху транспартных сродкаў.

Акрамя таго, праект закона прадугледжвае скарачэнне транспартнай дзяржпошліны для пенсіянераў па ўзросту, інвалідаў I або II групы, пры наяўнасці медыцынскай даведкі аб стане здароўя, якая пацвярджае іх прыдатнасць да кіравання транспартнымі сродкамі (за выключэннем выпадкаў, пры якіх прадугледжана іх поўнае вызваленне ад дзяржаўнай пошліны за выдачу дазволу на допуск транспартнага сродку да ўдзелу ў дарожным руху). Дзяржаўная пошліна для іх выплачваецца паводле стаўцы, паніжанай на каэфіцыент 0,5, у дачыненні да транспартнага сродку.

«Дэпутаты» бліжэйшым часам плануюць разгледзець праект закона ў першым чытанні.