Беларусь забараніла імпарт бульбы
142- 1.02.2014, 18:26
- 11,298
Менсельгасхарч мяркуе, што еўрапейская бульба не адпавядае айчынным стандартам.
Міністэрства сельскай гаспадаркі і харчавання Беларусі з 1 лютага 2014 года ўводзіць часовыя абмежаванні на пастаўку бульбы з краін Еўрапейскага звязу. З сённяшняга дня ў Беларусь перастануць увозіць харчовую і насенную бульбу, а таксама пасадачны матэрыял, за выключэннем матэрыялаў, якія паступаюць для дзяржаўнага сортавыпрабавання і навукова-даследчых мэтаў, паведамляе прэс-служба Менсельгасхарча.
Міністэрства тлумачыць гэты крок неаднаразовымі зваротамі Федэральнай службы ветэрынарнага і фітасанітарнага нагляду Расейскай Федэрацыі.
Выключэнне робіцца толькі для невялікіх гадавальнікаў на тэрыторыі Польшчы, Вугоршчыны, Латвіі і Нямеччыны, паколькі гэтыя зоны прызнаныя свабоднымі ад каранцінных аб'ектаў у адпаведнасці з міжнароднымі стандартамі і фітасанітарнымі мерамі.
Абмежаванні Менсельгасхарча не распаўсюджваюцца на тэрмічна апрацаваную бульбу і бульбу, якая ўваходзіць у склад паўфабрыкатаў.