Bloomberg: Рынак чакае дэвальвацыі грыўны на 20%

Чаканы курс украінскай валюты - 10,4 грыўны за даляр.

Форвардныя кантракты кажуць пра тое, што трэйдары чакаюць амаль 20% яе дэвальвацыі ў гэтым годзе, піша Bloomberg.

Валюты краін, якія развіваюцца, у цяперашні час знаходзяцца пад наймацнейшым з 2008 года ціскам, які выкліканы рашэннем Федрэзерва ЗША скараціць праграму колькаснага змякчэння і запаволеннем эканамічнага росту ў Кітаі, адзначае выданне.

"Калі вы пачынаеце спальваць занадта хутка свае валютныя рэзервы, гэта злавесны знак - і, вядома, на рынку адчуваюць пах крыві. Гэта стварае эфект даміно", - сказаў дырэктар рынкавых стратэгій Newedge Group SA у Нью-Йорку Роберт Ван Батэнбург.

Украінскія ўлады за апошнія тры гады выдаткавалі на ўтрыманне курсу грыўны 54% валютных рэзерваў: з красавіка 2011 года яны скараціліся з $38 млрд да $18 млрд. І чым менш рэзерваў застаецца ў Нацыянальнага банка, тым мацней дэвальвацыйныя чаканні на рынку. Трэйдары зараз ставяць на курс грыўны 10,40 грн/дал. да канца года.

Акрамя грыўны, дэвальвацыю таксама прагназуюць шэрагу іншых валют.

Нагадаем, 7 лютага Нацыянальны банк Украіны ўстанавіў афіцыйны курс грыўны ў адносінах да даляра на 7 лютага на ўзроўні 8,708. Дзеючы да гэтага афіцыйны курс 7,9930 грн за даляр утрымліваўся з 9 ліпеня 2012 года.