Падрабязнасці выбуху каля Дома ўрада: двое рабочых цудам выратаваліся

Здымачную групу скандальнага кінапраекта «Авель» прымусілі даць «падпіскі аб неразгалошванні».

Пасля таго, як у інтэрнэт трапіў сцэнар фільма, яго прадзюсер Сяргей Ждановіч забараніў усім карыстацца мабільным тэлефонам. Пра гэта, а таксама пра тое, якая атмасфера пануе на здымачнай пляцоўцы прапагандысцкай стужкі, якая здымаецца па замове ўладаў, распавёў на сваёй старонцы ў «Фэйсбуку» сцэнарыст Андрэй Курэйчык.

Ён адзначае, што яму ўдалося пагутарыць з членамі здымачнай групы.

«Па-першае, што прыемна, ім рэальна сорамна, што яны ў гэта ўвязаліся. Сорамна, па іх словах, і шматлікім акцёрам. Па-другое, іх усіх прымусілі падпісаць «падпіскі аб неразгалошванні», але пры гэтым з многімі забыліся заключыць працоўныя дамовы», - піша Андрэй Курэйчык.

Супрацоўнікі здымачнай групы таксама распавялі, што ў дзень публікацыі сцэнара «Авеля» прадзюсер фільма забараніў ім карыстацца мабільнымі тэлефонамі. Таксама яны паведамілі падрабязнасці нашумелага выбуху, які прагрымеў каля Дома ўраду ў Менску 1 лютага.

«Толькі ўчора выйшаў з бальніцы кіроўца Аляксандр Лазар, пра якога прадзюсер Сяргей Ждановіч бессаромна хлусіў увесь гэты час.

Значыць, як усё было па словах кінагрупы. Ждановіч вырашыў зэканоміць 80 даляраў на змене за транспарт. Ён у адзін «Мэрсэдэс Спрынтар», загадаў складаць рэквізіт і «звалку». Там жа ляжалі балоны газу для цеплапушак. Наогул, для гэтага звычайна выкарыстоўваюць розныя машыны па правілах тэхнікі бяспекі.

Было тры балона. Адзін забралі і прымацавалі да цеплапушкі. Другі, мабыць, быў пусты. А вось трэці ледзь і не стаў прычынай трагедыі. Рэквізіт, які на яго складзіраваўся, адкрыў вентыль. Акрамя Лазара ў бусе было яшчэ двое рабочых. Лазар адчуў пах газу і спыніў машыну. Што паслужыла прычынай дэтанацыі - невядома, Лазар казаў, што ён не паліў.

Агонь ад газу пайшоў уверх. Двое рабочых цудам паспелі выскачыць. Агонь імгненна ахапіў аўтобус. Баваўнянае адзенне Лазара ўспыхнула. Абпаліла таксама твар і рукі. Ён выскачыў з аўтобуса. Яго затушылі, накрыўшы брызентам, але рукі і твар апынуліся моцна абпаленымі. Была мацнейшая баратраўма. Бус за некалькі секунд выгарэў да тла. Калі б там заставаліся тры балона - было б тры трупы», - піша Андрэй Курэйчык.

Пра тое, што беларуская прапаганда задумала свой адказ фільму «Жыве Беларусь», стала вядома ў мінулым годзе.

Сяргей Ждановіч, вядомы як прадзюсер серыяла ПРААН «Вышэй за неба» і яго кампаніі, быў абраны Міністэрствам культуры Беларусі і адміністрацыяй Лукашэнкі для рэалізацыі праекта «Плошча кахання» («Авель»), які закліканы стаць беларускім афіцыйным адказам на «Жыве Беларусь» рэжысёра Кшыштафа Лукашэвіча па сцэнары Франака Вячоркі.

На прапагандысцкі фільм плануецца выдаткаваць каля 2 мільёнаў даляраў.