«Цітушкі» спалілі офісы «Свабоды» і «Удару» ў рэгіёнах

Офісы апазіцыйных партый у Харкаве і Крывым Рогу былі падпаленыя.

Актывісты апазіцыі ўпэўненыя, што гэта зрабілі прыхільнікі ўлады альбо баевікі - «цітушкі».

У Харкаве ноччу 19 лютага ў офісе мясцовай ячэйкі Усеўкраінскага аб'яднання «Свабода» па вул.Сумскай, 29 адбыўся пажар. «Улічваючы тыя зверствы, якія адбываюцца цяпер у сталіцы, мы нават не сумняваемся ў тым, што наш офіс быў падпалены. Інфармацыі аб пацярпелых няма. Мы нават не сумняваемся, што наш офіс падпалілі», - гаворыцца ў заяве кіраўніка Харкаўскай гарарганізацыі ВА «Свабода» Аляксандра Гавы.

Як адзначаецца ў заяве, дадзены інцыдэнт «не можа быць збегам абставінаў» і патрабуе «неадкладнага расследавання, знаходжання і пакарання заказчыкаў і выканаўцаў гэтага злачынства», піша gazeta.ua.

У Крывым Рогу (Днепрапятроўская вобл.) ўначы ў сераду каля 1.30, невядомыя падпалілі офіс гарадскога аддзялення партыі «Удар». Як распавёў кіраўнік Крыварожскага гарвыканкама партыі Віктар Шчарбіна, офіс знаходзіцца на першым паверсе пяціпавярховага дома. Спачатку ў зламыснікаў была спроба яго ўзламаць.

«Яны спрабавалі ўскрыць аконную рашотку. У іх нічога не атрымалася. Тады, разбіўшы акно, яны кінулі бутэльку з запальнай сумессю», - распавёў Шчарбіна.

Паводле яго слоў, жыхары дома не пацярпелі. Пажар быў ліквідаваны супрацоўнікамі ДСНС. Міліцыя на месца здарэння прыбыла праз гадзіну.