Жыхара Мазыра выселілі з кватэры за даўгі (Відэа)
8- 19.02.2014, 15:36
- 11,874
Мазыранін пазбавіўся кватэры, у якой пражыў амаль паўстагоддзя.
Па рашэнні суда мужчыну выселілі з двухпакаёвай кватэры, у якой ён пражыў 46 гадоў, з прадастаўленнем меншага па плошчы і камфортнасці жылля. Такія меры вымушаныя, каментуюць мазырскія камунальнікі. У рэгіёне доўг насельніцтва за паслугі ЖКГ складае больш за 400 мільёнаў рублёў, паведамляе тэлеканал «Мозырь».
Збіраць рэчы гаспадар не спяшаецца і просіць тры дні адтэрміноўкі. Сцвярджае, што быў на заробках у Расеі, вярнуўся, доўг па камунальных паслугах аплаціў. Але рашэнне суда так проста не адмяніць, піша onliner.by.
«З 2004 года грамадзянін нерэгулярна аплачваў камунальныя паслугі. У кастрычніку было прынята рашэнне падаць пазоўную заяву на перасяленне яго ў кватэру меншай плошчы. І ў снежні судом было прынята такое рашэнне», - распавядае намеснік начальніка юрыдычнага аддзела ГП «Мазырскі райжылкамгас» Яраслаў Лапіцкі.
У мінулым годзе ў Мазырскі суд было пададзена 19 падобных пазоўных заяў. Па васьмі з іх было прынята рашэнне аб высяленні. Астатнія наймальнікі вырашылі не спакушаць лёс і паспяшаліся пагасіць сваю шматгадовую запазычанасць.