Ваенныя пенсіянеры Барысава: Мы зробім свой Майдан
64- 19.02.2014, 17:41
- 43,139
Барысаўскія пенсіянеры незадаволеныя сацыяльнымі выплатамі.
Учора ў клубе палка сувязі ў Барысаве адбылася сустрэча ваенных пенсіянераў з прадстаўнікамі Міністэрства абароны і кіраўніцтвам Барысаўскага гарнізона, піша barysau.by.
Сустрэча была выкліканая зваротамі былых вайскоўцаў у высокія інстанцыі з нагоды пенсійнага забеспячэння і ўзроўню сацыяльнай абароны.
Як паведаміў адзін удзельнікаў сходу ex-press.by (журналістаў на тэрыторыю вайсковай часткі не пусцілі) пенсіянеры задавалі пытанні аб тым, чаму пасля прыняцця ўказаў і пастаноў, прыбаўка да грашовага забеспячэння і пенсіі малодшых афіцэраў і прапаршчыкаў склала ўсяго 15%, а палкоўнікаў і старэйшых афіцэраў - 60%, чаму малодшым афіцэрам і прапаршчыкам адмаўляюць у лячэнні ў шпіталях, хоць нават жонкі старэйшых афіцэраў маюць гэтую магчымасць і карыстаюцца, а таксама чаму пазбавілі ўсіх льгот «афганцаў» уключаючы лячэнне, пратэзаванне, забеспячэнне лекамі і г.д.
Таксама пенсіянераў цікавіла, чаму да гэтага часу ў «афганцаў» няма статусу і чаму іх не прыраўняюць да ўдзельнікаў ВАВ. Сярод іншых пытанняў - чаму пенсіі былым ваенным разлічвае грамадзянскае ведамства - Міністэрства працы і сацыяльнай абароны - і чаму прыбралі надбаўкі пенсіянерам, якія дасягнулі 80-гадовага ўзросту.
«Людзей, якія аддалі служэнню радзіме 25-30 гадоў, лепшыя свае гады, здароўе, прайшлі Афган, Чарнобыль, «гарачыя» кропкі, дзяржава проста кінула. Замоўчванне і нежаданне ваенных чыноўнікаў і кіраўнікоў рознага ўзроўню вырашаць неабходныя сацыяльныя і іншыя пытанні дадзенай катэгорыі ў самым пачатку заахвоціла ваенных пенсіянераў да актыўных дзеянняў. І не толькі ў Барысаўскім гарнізоне, але і ў іншых гарнізонах і ваенных гарадках.
Вялікая колькасць скаргаў, зваротаў былі накіраваныя ў вышэйшыя інстанцыі, але канкрэтнага адказу так і не атрымалі, за выключэннем аднаго: «Вядзецца праца ў гэтым кірунку». Якая праца і што робіцца ў гэтым кірунку - застаецца таямніцай - распавядае ўдзельнік сходу. - Каб супакоіць дадзеную катэгорыю вайскоўцаў і зняць напружанне напярэдадні «выбараў» у мясцовыя Саветы, у Барысаве і адбылася гэтая сустрэча. Клуб часткі не змог змясціць усіх жадаючых. Многія былі настроеныя агрэсіўна, мабыць цярпенне на мяжы. Некаторыя з прысутных выкрыквалі з залы «ўчынім свой Майдан».
Па наяўнай інфармацыі, здавальняючых адказаў на свае пытанні ваенныя пенсіянеры так не атрымалі. Яны вырашылі стварыць ініцыятыўную групу, якая будзе працягваць адстойваць правы былых кадравых вайскоўцаў.