Губернатара Валыні прыкавалі кайданкамі да сцэны
59- 19.02.2014, 17:53
- 34,688
Актывісты арыштавалі губернатара Валынскай вобласці Украіны Аляксандра Башкаленку.
Прызначанага Віктарам Януковічам старшыню адміністрацыі вывелі на сцэну на Тэатральнай плошчы горада Луцка і прымушалі напісаць заяву аб звальненні, паведамляе РБК-Украіна.
Дэпутат гарсавета Павел Данільчук адзначыў, што на плошчы стаяць 30 тысяч грамадзян, якія патрабуюць толькі аднаго - адстаўкі губернатара.
У сваю чаргу, Аляксандр Башкаленка наадрэз адмовіўся пісаць заяву. Ён дадаў, што спрабуе зрабіць усё, каб прадухіліць кровапраліцце. А знаходзячыся на пасадзе губернатара, будзе мець для гэтага значна больш магчымасцяў.
Башкаленка спрабаваў на лесвіцы памяшкання УМВД супакоіць пратэстоўцаў, а людзі яму скандавалі: «На калені». Ён не пагаджаўся гэтага зрабіць, і ўзнікла бойка.
Губернатара павалілі на зямлю і пачалі біць. Байцам Самаабароны і «Правага сектара» ледзь удалося вызваліць Башкаленку. Яму дапамаглі зайсці назад у памяшканне міліцыі, каб пазбегнуць самасуду.
Зараз ідзе гарачая дыскусія з нецэнзурнымі выразамі з патрабаваннем яго адстаўкі.
Пасля 15-хвіліннай дыскусіі Данільчук заявіў, што Аўтамайдан і частка «Правага сектара» адпраўляюцца ў дом губернатара за яго сям'ёй. Башкаленку прыкавалі кайданкамі да сцэны, пакуль ён не напіша заяву аб адстаўцы. Акрамя таго, на яго вылілі шмат халоднай вады.
Зараз актывісты перабазіруюцца ў памяшканне аблпракуратуры на вуліцы Вінічэнкі і рыхтуюцца да штурму будынка.