Клічко папрасіў прабачэння перад Майданам і гатовы патрабаваць адстаўкі Януковіча
60- 22.02.2014, 0:39
- 3,943
Лідар «Удару» прынёс прабачэнні за поціск рукі прэзідэнту Украіны.
Гэта здарылася пасля таго, як Віталь Клічко выслухаў людзей, абураных дамоўленасцямі лідараў апазіцыі і Віктара Януковіча. Для гэтага ён другі раз выйшаў на сцэну Майдана ў Кіеве, піша «Украінская праўда».
«Я правёў тут, на Майдане, шмат часу, шмат начэй. Я ўпершыню сёння не мог выступіць, бо людзі крычалі: яны не хацелі мяне чуць. Яны не хацелі чуць, што сёння працягнуў я руку Януковічу, павіншаваўшы яго», - сказаў Клічко.
«Разумею, і задавальнення ад гэтага я ніколі не атрымліваў. Але адно хачу сказаць: калі кагосьці пакрыўдзіў, я прашу прабачэння за гэта - але я раблю шчыра ўсё для таго, каб Украіна перамагла. Я раблю ўсё шчыра, што ад мяне залежыць, для таго, каб не пралілася кроў», - заявіў ён.
Клічко запэўніў, што робіць «шчыра ўсё для таго, каб гэтая банда (улада Януковіча) была зрынутая».
«Калі трэба сустрэцца і зрабіць так, каб пераканаць чалавека, каб ён сышоў у адстаўку, каб пераканаць, каб ён не выкарыстаў зброю супраць людзей - я буду выкарыстоўваць любую пляцоўку: Вярхоўную Раду..., - заявіў ён. - Трэба будзе, буду ісці дамаўляцца, буду ісці патрабаваць, буду рабіць усё шчыра».
«Калі кагосьці пакрыўдзіў, я хачу папрасіць прабачэння перад кожным. Але хачу сказаць шчыра: я раблю гэта за сваю Радзіму. Таму яшчэ мне нічога не трэба - толькі адно: сучасная краіна, у якой я хачу жыць. Выбачайце, калі каго пакрыўдзіў», - сказаў ён.
Раней, пасля першага выхаду на сцэну, Клічко сказаў актывістам, што Януковіч добраахвотна ў адстаўку не сыдзе.
Фота: AFP