Як сканчаюць дзеці зрынутых кіраўнікоў

Тэма лёсаў дзяцей былых прэзідэнтаў і дыктатараў зноў стала актуальнай пасля імпічменту Януковічу.

«Салідарнасць» узгадала, чым вызначыліся дзеці іншых адыёзных кіраўнікоў, і як складваліся іх лёсы пасля краху рэжыму ў краіне і змены ўлады.

Аляксандр Януковіч кіраваў снайперамі, забіваў людзей у цэнтры Кіева

У аб'яднанай снайперскай групе, якая забівала бяззбройных людзей падчас сутыкненняў у цэнтры Кіева, былі сабраныя снайперскія пары з спецпадраздзяленняў «Амега», «Булат», «Альфа», а аперацыі па падаўленні пратэстаў ажыццяўляў асабіста сын Януковіча - Аляксандр.

Пра гэта на сваім акаўнце ў сацыяльнай сетцы «Фэйсбук» паведаміў журналіст Юрый Бутусаў.

- Знайшоў некалькіх снайпераў, якія 20 лютага атрымалі дазвол весці агонь на Інстытуцкай, якія былі на відэа. Дык вось, у аб'яднанай снайперскай групе былі сабраныя снайперскія пары спецпадраздзяленняў «Амега» (МУС), «Булат» (ахова Януковіча), «Альфа» (СБУ). Магчыма, нехта яшчэ - «Цень» з Крыма і «Сокал» (УБАЗ МУС). Аўтаматчыкі груп прыкрыцця таксама былі са складу гэтых частак, хоць «Амега » пераапранулася ў форму «Беркута», - паведаміў журналіст.

Бутусаў падкрэсліў, што гэта не асобныя наёмныя забойцы - гэта штатныя супрацоўнікі.

- Агонь па бяззбройных людзях яны вялі па загадзе. Гэта добра. Добра, таму што мы зараз цалкам раскруцім увесь ланцужок. Кіраўніцтва аперацыі па падаўленні пратэстаў ажыццяўляў асабіста сын Януковіча - Аляксандр. Я сказаў падазраваным, што ўсе ўдзельнікі злачыннай аперацыі павінны разумець - чым хутчэй яны здадуцца прэсе і следству, тым вышэй у іх шанцы, што іх не «зачысцяць» і не прымусяць застрэліцца двума кулямі.

Паводле інфармацыі ўкраінскіх СМІ, Аляксандр Януковіч пакінуў свой маёнтак у Данецку. Дзе ён зараз - невядома.

Чаму малодшы сын Кадафі марыць аб Гаазе

Калі віна сына Януковіча будзе даказаная ў судзе, ён можа паўтарыць лёс спадчынніка зрынутага лівійскага лідара Муамара Кадафі - Саіф аль-Іслама Кадафі.

Сын Кадафі Мутасім загінуў разам са сваім бацькам у Сірце. Характэрна, што затрымалі яго яшчэ жывым. Але затым, як паведамляецца, ён быў забіты, аказаўшы супраціў байцам Нацыянальнага Пераходнага Савета, якія затрымалі яго.

Другі сын Муамара Кадафі, якога лічылі галоўным пераемнікам палкоўніка, Саіф аль-Іслам быў арыштаваны ў Лівіі ў лістападзе 2011 года. Ён і трое яго целаахоўнікаў хаваліся ў пустыні на поўдні краіны. Саіф аль-Іслам абвінавачваецца ў датычнасці да масавых забойстваў, рабаванняў, выкраданняў людзей і дыверсій. Для жыхароў Трыпалі арышт малодшага Кадафі стаў сапраўдным святам.

Па лівійскіх законах Саіф аль-Ісламу пагражае смяротнае пакаранне.

Слуханні па яго справе павінны аднавіцца 27 лютага.

Сын Кадафі выказваўся за тое, каб яго судзілі ў Гаазе, дзе яму пагражае пажыццёвае зняволенне, але не смяротны прысуд. Выдачы аль-Іслама патрабаваў ад Лівіі Міжнародны крымінальны суд, які абвінаваціў сына Кадафі ў злачынствах супраць чалавечнасці. Міжнародныя праваабарончыя арганізацыі Human Rights Watch і Amnesty International заклікалі Лівію рушыць услед рашэнню МКС, аднак у выніку было вырашана судзіць аль-Іслама на радзіме.

Сын Мубарака пасля перавароту выпіў яд

Сын экс-прэзідэнта Егіпта Хосні Мубарака пасля перавароту і сыходу ад улады бацькі спрабаваў скончыць жыццё самагубствам.

Ён падсыпаў атруту ў кубак гарбаты, выпіў яго, а затым страціў прытомнасць. Атручанага выратавалі выкліканыя своечасова лекары. Гэта здарылася ў Каіры, пасля таго, як праваахоўныя органы распачалі спробу канфіскаваць грашовыя сродкі з яго некалькіх замежных банкаўскіх рахункаў.

Пазней журналісты брытанскіх выданняў паведамілі, што ў студзені 2011 года Мубарак-малодшы прыляцеў у Лондан на прыватным самалёце, прыхапіўшы з сабой 97 чамаданаў.

У снежні 2013 года суд апраўдаў сына Мубарака па справе аб махінацыях з зямельнымі ўчасткамі.

Раней Гамаль выплаціў Цэнтральнаму банку краіны паўмільёна даляраў, такім чынам, кампенсаваўшы нанесеную матэрыяльную шкоду ў перыяд, калі ўваходзіў у Савет кіраўнікоў банкам.

Сын Бакіева любіў гуляць у карты калодай з чыстага золата

У Лондане хаваецца ад правасуддзя радзімы і сын зрынутага прэзідэнта Кыргызстана, былы кіраўнік Цэнтральнага агенцтва па развіцці, інвестыцыях і інавацыях Максім Бакіеў.

Першамайскі суд Бішкека ў 2013 годзе завочна прысудзіў яго да 25 гадоў турмы з канфіскацыяй маёмасці і пазбаўленнем права займаць пэўныя пасады тэрмінам на тры гады, з адбываннем пакарання ў калоніі ўзмоцненага рэжыму.

Максім Бакіеў прызнаны вінаватым у карупцыі, заключэнні кантракту і ажыццяўленні дзяржаўнай закупкі насуперак інтарэсам краіны.

У кастрычніку 2012 года ён быў затрыманы ў Лондане па запыце ФБР, якое абвінаваціла яго ў махлярстве з каштоўнымі паперамі. Тады суд адпусціў яго пад заклад 250 тысяч фунтаў стэрлінгаў.

У 2012 годзе Бакіеў-малодшы атрымаў у Лондане палітычны прытулак. ЗША запыталі Велікабрытанію аб экстрадыцыі Бакіева для таго, каб ён паўстаў перад федэральным судом ЗША па сур'ёзных абвінавачваннях: змова з мэтай здзяйснення махлярства з каштоўнымі паперамі і перашкода ажыццяўленню правасуддзя.

Аднак пасля крымінальная справа была спыненая.

Дарэчы, сын экс-прэзідэнта Кыргызстана, які хаваецца ў Беларусі, быў начальнікам перадвыбарчага штаба свайго бацькі падчас прэзідэнцкай кампаніі 2009 года. На тых выбарах Курманбек Бакіеў атрымаў «элегантную» перамогу, набраўшы больш за 76% галасоў.

Людзі з атачэння Бакіева-малодшага расказвалі пра яго страсць да раскошы. Нават у карты сын дыктатара любіў гуляць калодай з чыстага золата.

Дачка прэзідэнта Туніса - махлярка

Дачка зрынутага ў выніку «язмінавай рэвалюцыі» прэзідэнта Туніса, які кіраваў краінай у 1987-2011 гадах, была прызнаная вінаватай у махлярстве з нерухомасцю. Алі Нясрын асуджаная на восем гадоў пазбаўлення волі. А яе муж атрымаў 16 гадоў турмы.

Пасля масавых беспарадкаў, якія панеслі жыцці больш як 80 чалавек, бэн Алі ўцёк з Туніса з сям'ёй у Саудаўскую Аравію, дзе атрымаў палітычны прытулак. СМІ паведамлялі, што ён прыхапіў з сабой 10 мільярдаў еўра, а яго жонка забрала з цэнтральнага банка краіны паўтары тоны золата.

Гэтыя прыклады з найноўшай гісторыі паказваюць, як падобныя лёсы спадчыннікаў дыктатараў. Пасля падзення рэжымаў дзеці зрынутых прэзідэнтаў аказваюцца фігурантамі крымінальных спраў і вымушаныя бегчы, хаваючыся ад правасуддзя.