Украіна запатрабавала склікання Саўбезу ААН
21- 28.02.2014, 12:14
- 20,808
Вярхоўная рада прыняла пастанову аб звароце ў Савет бяспекі ААН з патрабаваннем склікання пасяджэння для разгляду сітуацыі ў Крыме.
Пра гэта паведамляе РІА Новости.
Спікер Рады, выконваючы абавязкі прэзідэнта Украіны Аляксандр Турчынаў паведаміў, што Кіеў просіць Саўбез ААН правесці маніторынг сітуацыі ў Крыме і прыняць меры ў выпадку парушэння суверэнітэту Украіны.
Турчынаў таксама паведаміў, што прызначыў на пятніцу пасяджэнне Савета нацыянальнай бяспекі і абароны (СНБА) Украіны з-за сітуацыі ў Крыме. Пасяджэнне пачнецца ў 11:00 па мясцовым часе.
Акрамя таго, украінскі парламент прыняў зварот да дзяржаў-гарантаў Будапешцкага мемарандума (Мемарандум аб гарантыях бяспекі ў сувязі з далучэннем Украіны да Дамовы аб нераспаўсюджванні ядзернай зброі) з патрабаваннем «практычнымі дзеяннямі» пацвердзіць узятыя на сябе абавязацельствы.
«Вярхоўная Рада патрабуе ад Расейскай Федэрацыі спыніць крокі, якія маюць прыкметы замаху на дзяржаўны суверэнітэт і тэрытарыяльную цэласнасць Украіны, у тым ліку адмовіцца ад падтрымкі сепаратызму ва Украіне ў любой форме», - адзначаецца ў звароце, які цытуе «Інтэрфакс-Украіна».