Былы намеснік старшыні Барысаўскага райвыканкама прысуджаны да дзевяці гадоў
- 28.02.2014, 13:10
- 2,999
Чыноўнік браў хабары і перавышаў службовыя паўнамоцтвы.
У судовым пасяджэнні ў Жодзіна разгледжаная крымінальная справа па абвінавачванні намесніка старшыні Барысаўскага раённага выканаўчага камітэта ў неаднаразовым атрыманні хабараў і перавышэнні службовых паўнамоцтваў.
Як паведаміў БелаПАН першы намеснік пракурора Менскай вобласці Мікалай Пілінкевіч, чыноўнік браў хабары за рашэнне розных пытанняў, якія ўваходзяць у яго кампетэнцыю: заключэнне дамоваў арэнды памяшканняў, змена спосабу ўключэння ў гаспадарчы абарот будынка, які не выкарыстоўваецца, заключэнне інвестыцыйнай дамовы, заключэнне дамоваў арганізацыі аўтамабільных перавозак.
Па выніках судовага разгляду крымінальнай справы чыноўнік прысуджаны да дзевяці гадоў пазбаўлення волі з канфіскацыяй маёмасці і пазбаўленнем права на пяць гадоў займаць пасады, звязаныя з выкананнем арганізацыйна-распарадчых абавязкаў.