МЗС Расеі ўручыў ноту дарадцу амбасады Украіны

Масква палічыла падзеі ў Крыме следствам унутрыпалітычных працэсаў і адмовілася ад кансультацый.

МЗС РФ уручыў дарадцу-пасланцу амбасады Украіны Руслану Нямчынскаму ноту з-за падзей у Крыме ў адказ на прапанову МЗС Украіны аб неадкладных двухбаковых кансультацыях, паведамляе прэс-служба ведамства.

Кіеў прапаноўваў правесці кансультацыі ў рамках артыкула 7 дамовы аб дружбе, супрацоўніцтве і партнёрстве паміж Расеяй і Украінай ад 31 траўня 1997 года. Яна мяркуе неадкладныя кансультацыі, калі ў адной з краін ўзнікае сітуацыя, якая «стварае пагрозу міру, парушае мір ці закранае інтарэсы яе нацыянальнай бяспекі, суверэнітэту і тэрытарыяльнай цэласнасці».

Масква палічыла падзеі ў Крыме следствам унутрыпалітычных працэсаў і адмовілася ад кансультацый.

Акрамя таго, МЗС РФ перадаў украінскаму боку ноту, у якой гаворыцца, што перамяшчэнні бронетэхнікі Чарнаморскага флоту РФ у Крыме звязаныя з неабходнасцю ахоўваць месцы дыслакацыі флоту і адпавядаюць базавым расейска-украінскім пагадненням.

МЗС Украіны запатрабаваў тэрміновых кансультацый і папрасіў, каб падраздзяленні Чарнаморскага флоту «ўстрымаліся ад руху па-за дыслакацыяй», 27 лютага.

Сітуацыя ў Крыме абвастрылася ў 20-х чыслах лютага, калі ў Кіеве ўлада перайшла да апазіцыі. Нагадаем, учора ў Сімферопалі невядомыя захапілі парламент і ўрад аўтаноміі і ўсталявалі на будынках расейскія сцягі. Праваахоўнікі адкрылі крымінальную вытворчасць па артыкуле «тэракт». Дэпутаты прызначылі на 25 траўня рэферэндум па пашырэнні паўнамоцтваў аўтаноміі, а таксама выказалі недавер Савету міністраў аўтаноміі, які з лістапада 2011 года ўзначальваў Анатоль Магілёў. Па некаторых звестках, падчас правядзення сесіі не было кворуму.

Вярхоўная Рада Украіны запатрабавала склікання Савета бяспекі ААН для разгляду сітуацыі ў Крыме.