Штэфан Фюле: ЕЗ павінен прадаставіць Украіне перспектыву сяброўства

Пагадненне аб асацыяцыі - не канчатковая мэта Кіева і Брусэля.

Еўрапейскі камісар па пытаннях пашырэння і Еўрапейскай палітыкі суседства Штэфан Фюле паказвае, што пасля выканання Пагаднення аб асацыяцыі ЕЗ павінен, у адпаведнасці з 49 Лісабонскай дамовай пра ЕЗ, прадаставіць Украіне перспектыву сяброўства, піша «Корреспондент».

Гэта вынікае з яго слоў падчас выступлення ў Еўрапейскім парламенце ў Страсбургу познім вечарам панядзелка.

У прыватнасці, Фюле, звяртаючыся да Еўрапейскага парламенту, нагадаў аб тым, што некаторыя партнёры ЕЗ, у ліку якіх і Украіна, у рамках Усходняй палітыкі суседства «выразна вызначылі свае еўраінтэграцыйныя памкненні». «Мы занадта доўга чакалі, якім чынам гэта адлюстраваць і як на гэта адказаць. На нядаўнім пасяджэнні Рады ЕЗ па пытаннях замежных спраў падчас дыскусіі аб Украіне было прынята рашэнне, што Пагадненне аб асацыяцыі і глыбокай і ўсёабдымнай зоне свабоднага гандлю - гэта не канчатковая мэта супрацоўніцтва Украіны і ЕЗ. Гэта - важная падзея, таму што толькі ў духу артыкула 49 Лісабонскай дамовы мы зможам выкарыстаць усе перавагі Пагаднення аб асацыяцыі», - заявіў ён.

Пагадненне аб асацыяцыі паміж Украінай і ЕЗ падпішуць у бліжэйшыя тыдні. Пра гэта 7 сакавіка заявіў прэм'ер-міністр краіны Арсеній Яцанюк.

«Канцлер Германіі Ангела Меркель, з якой у нас учора была сустрэча, толькі што заявіла аб тым, што гэта падпісанне адбудзецца ў самы кароткі перыяд, літаральна некалькі тыдняў», - сказаў Арсеній Яцанюк на прэс-канферэнцыі ў пятніцу па выніках візіту ў Брусэль.

Паводле слоў прэм'ера, цяпер праходзяць выключна тэхнічныя кансультацыі аб даце падпісання пагаднення. Акрамя таго, у рамках гэтага рашэння ёсць рашэнне аб падтрымцы далейшых дзеянняў па адмене віз паміж Украінай і ЕЗ.