Андрэй Іларыёнаў: Пуцін рыхтуе наступ на Кіеў

Прэзідэнт Расеі не абмяжуецца захопам Крыма.

Былы дарадца Уладзіміра Пуціна, навуковы супрацоўнік Інстытута Катона Андрэй Іларыёнаў у інтэрв'ю Die Presse падзяліўся сваім бачаннем расейска-украінскага крызісу, які, на яго думку, носіць больш маштабны характар і пагражае перарасці ў "агульнаеўрапейскі крызіс з гарантаваным удзелам суседніх краін, дзяржаў-членаў НАТА і ЗША", піша Inopressa.ru.

"Гэта вынік ператварэння Расеі з паўсвабоднай краіны, якой яна была ў 2002 годзе, у цяперашнюю паўнавартасную аўтакратыю, - сказаў эканаміст. - Палітычны рэжым сёння наскрозь аўтарытарны. Пакуль ён не таталітарны, але блізка да таго. Расея сёння - зусім не тая краіна, што ў 2002 годзе: гэта краіна з палітвязнямі, запалохваннем меншасцяў, палітычнай апазіцыі, гомасэксуалістаў і многіх іншых. Яе знешняя палітыка вельмі агрэсіўная. Расея заняла рэвізіянісцкую, рэваншысцкую пазіцыю, мэта якой у тым, каб зноўку прачарціць межы ў Еўропе. Гэта не жарт, а афіцыйная палітыка ўрада".

Пачынаючы з 2004 года Расея з'яўляецца нават не паўдэмакратычнай, а зусім аўтарытарнай краінай, а пасля незаконнага ўварвання ў Грузію ў 2008 годзе яна, з пункту гледжання міжнароднай супольнасці, страціла права на сяброўства ў "вялікай васьмёрцы", мяркуе Іларыёнаў. Зрэшты, адзначыў ён, выключэнне з гэтага клуба Пуціна "зараз ужо не засмуціць... Ці паўплывала на Сталіна выключэнне [СССР] з Лігі Нацый у 1939 годзе пасля нападу на Фінляндыю? Не. Было занадта позна. Яго рэжым [да таго часу] ўжо ператварыўся ў нешта такое, што карэнным чынам адрознівалася ад традыцыйных уяўленняў большай частцы міжнароднай супольнасці. Таму на вобраз дзеянняў Пуціна сёння не паўплывала б і выключэнне Расеі з ААН". На пытанне, чаму Расею не выключылі з G8 пасля грузінскай вайны, Іларыёнаў адказаў: "Можна было б яшчэ спытаць Даладзье і Чэмберлена, чаму яны ў 1938 годзе не прынялі адпаведных мер супраць Гітлера і Мусаліні. Тады гэта называлася "супакаеннем", сёння кажуць пра "пачатак з чыстага ліста".

...Гэта не крымскі крызіс. І не ўкраінскі крызіс. Гэта крызіс, які можа прывесці да поўнамаштабнай вайны... Далучэнне Крыма практычна адбылося... Больш за тое, падрыхтаваны і наступ на сам Кіеў. Мэта Пуціна - Кіеў і ўся Украіна. Ён хоча цяпер стварыць сухапутны калідор з Крыма ў Прыднястроўе, дзе ўжо даўно запраўляюць былыя афіцэры КДБ і, адпаведна, ФСБ. Гэты калідор закліканы адрэзаць Украіну ад Чорнага мора". Іларыёнаў лічыць, што "напад на Украіну Пуцін запланаваў год таму".

Калі ЗША і Еўропа не прымуць меры, то рэалізацыя гэтага сцэнара - "толькі пытанне часу. Пад "мерамі" ён мае на ўвазе вылучэнне ў бок канфліктнай зоны вайсковага кантынгенту краін Захаду. У 2008 годзе менавіта "рашэнне прэзідэнта Буша перакінуць у Турцыю і Румынію эскадрыллі ВПС ЗША і адправіць у Чорнае мора ваенныя караблі" прымусіла Расею спыніць свае войскі ў 60 км ад Тбілісі, перакананы Іларыёнаў. "Ніхто сёння не хоча рабіць нічога ў гэтым родзе. Я і сам не хачу, каб гэта рабілася. Але я не бачу іншага сродку пакласці канец агрэсіі і акупацыі", - дадаў ён.