Былыя «беркутаўцы» зладзілі дэбош у Вінніцы

У Вінніцы за грубае парушэнне грамадскага парадку затрыманыя супрацоўнікі ліквідаванага спецпадраздзялення «Беркут».

Звесткі пра крымінальныя правапарушэнні, прадугледжаныя ч.3 арт.296 Крымінальнага кодэкса Украіны паводле факту грубага парушэння грамадскага парадку, звязанага з супрацівам работнікам міліцыі, унесеныя следчым аддзелам пракуратуры Вінніцкай вобласці ў Адзіны рэестр дасудовых расследаванняў, паведамляе РБК Украіна.

Як паведамілі ў следчым аддзеле пракуратуры вобласці, у ноч на 11 сакавіка праваахоўнікі разам з чальцамі грамадскай арганізацыі «Народнай самаабароны» ў Вінніцы, патрулюючы вуліцы горада, спынілі падазроны аўтамабіль. Мужчыны, якія знаходзіліся ў аўтамабілі, знаходзіліся ў нецвярозым стане, паводзілі сябе задзірліва, абражалі прадстаўнікоў «Народнай самаабароны» і збілі аднаго з іх. Акрамя таго, адзін з правапарушальнікаў, які спрабаваў схавацца з месца здарэння, ужыў траўматычную зброю.

Устаноўлена, што зламыснікамі былі супрацоўнікамі былога спецпадраздзялення «Беркут», якія на той час не знаходзіліся пры выкананні службовых абавязкаў. На гэты момант яны затрыманыя. «З мэтай забеспячэння поўнага, ўсебаковага і бесстаронняга расследавання ў крымінальнай справе створана група следчых. Ход дасудовага расследавання кантралюецца кіраўніцтвам пракуратуры Вінніцкай вобласці», - паведамляюць у пракуратуры. Нагадаем, спецпадраздзяленне «Беркут» было ліквідавана ў канцы лютага 2014 года.