Аляксандр Алесін: Лукашэнка наўмысна напружвае сітуацыю

Прапанова размясціць у Беларусі новыя самалёты РФ - хітры ход дыктатара.

Такое меркаванне сайту charter97.org выказаў вайсковы аглядальнік Аляксандр Алесін, каментуючы прапанову Лукашэнкі размясціць у Беларусі яшчэ 15 расейскіх баявых самалётаў.

«У прынцыпе гэта справа некалькіх гадзін. Далёкасць гэтых самалётаў дазваляе ўзляцець з тэрыторыі авіябазы дзе-небудзь у Расеі і прызямліцца ў Баранавічах. Гэта значыць, яны проста перамесцяцца на аэрадром перадавога базавання. Лукашэнка сказаў, што існуюць адпаведныя мабiлiзацыйныя планы, і ў выпадку абвастрэння крызісу расейскія вайскоўцы высунуцца на перадавыя рубяжы ў Беларусі, як і прадугледжана дакументамі па абароне «саюзнай дзяржавы». Таму я думаю, што тут усё прадумана, падрыхтавана, прааналізавана і адпаведныя маршруты пракладзеныя», - адзначыў эксперт.

Пры гэтым аглядальнік падкрэсліў, што больш важнае пытанне - навошта гэта рабіць.

«Маштаб вучэнняў НАТА і тое, што яны не накіраваныя супраць Беларусі, не дазваляе меркаваць, што ваенная небяспека для нашай краіны вырасла. І гэта можа здацца досыць нечаканым, але справа ў тым, што Лукашэнка наўмысна напружвае сітуацыю з тым, каб ураўнаважыць досыць гучныя, самастойныя і палітычныя выказванні, у тым ліку ў дачыненні да Украіны. Вайсковай лаяльнасцю ён як бы заваёўвае сабе пэўную палітычную самастойнасць у знешняй палітыцы. Ён гуляе, як мне здаецца, на струнках вайскова-палітычнага кіраўніцтва Расеі, якое вельмі зацікаўлена ва ўскосным або прамым кантролі за геапалітычнай прасторай Беларусі. Бо яна клінам уразаецца ў краіны НАТА балконам, з якога можна рухацца на захад, поўнач і поўдзень. Таму тое, што Лукашэнка падкрэслена захоўвае вайсковую вернасць Расеі, ураўнаважвае яго нейкую смеласць паводле стаўлення да Украіны. Гэта значыць ён балансуе», - перакананы Аляксандр Алесін.

Нагадаем, сёння падчас пасяджэння Савета бяспекі ў Менску беларускі дыктатар прапанаваў размясціць дадатковыя расейскія вайсковыя самалёты на тэрыторыі нашай краіны ў сувязі з актыўнасцю НАТА ля межаў «саюзнай дзяржавы».

«Калі з Італіі перакінутыя (у краіны Балтыі) паўтара дзясятка самалётаў, я думаю, трэба звязацца з начальнікам Генштаба Расеі і прапанаваць ім тое ўзмацненне, якое яны абавязаны даць нам (у рамках саюзніцкіх адносін). Зараз, дапусцім, не больш за 12-15 самалётаў, перагнаць іх на тэрыторыю Беларусі, вызначыць маршруты патрулявання і яшчэ запасныя маршруты. Няхай працуюць, патрулююць», - заявіў Лукашэнка.