Украінскія памежнікі затрымалі ўзброенага расейскага салдата

Затрыманым аказаўся ўраджэнец Чачні. Ён быў узброены аўтаматам.

Сёння раніцай памежны нарад, які ажыццяўляў патруляванне паблізу населенага пункта Чангар, затрымаў расейскага вайскоўца.

Паводле паведамлення, ім аказаўся ўраджэнец Чачэна-Інгушскай СССР 1985 года нараджэння, вайсковец в/ч 27777 УС Расеі Сусараў Рамзан. У багажніку аўтамабіля, на якім перасоўваўся вайсковец, быў знойдзены аўтамат АК і 180 патронаў да яго, пісталет Макарава, а таксама ваенная форма і бронекамізэлька, гаворыцца ў паведамленні.

Памежнікі таксама адзначаюць, што цяпер удакладняюцца ўсе абставіны інцыдэнту. Пасля правядзення фільтрацыйных мерапрыемстваў у дачыненні да расейскага вайскоўца, ён будзе перададзены іншым праваахоўным органам.

Раней аб затрыманні Рамзана Сусарава паведамляла група "Інфармацыйны супраціў". Такім чынам, дадзеная інфармацыя афіцыйна пацвердзілася.