У выходныя ў Беларусь прыйдзе цыклон Еў

Сіноптыкі папярэджваюць беларусаў аб цыклоне Еў, аднак абяцаюць, што другім Хаўерам ён не стане.

Чакаецца шквалістае ўзмацненне ветру да 7-12 метраў за секунду з парывамі да 15-22 метраў за секунду, а вечарам у суботу - з парывамі да 23-28 метраў за секунду. Сіноптыкі заклікаюць выконваць асцярожнасць, асабліва на дарозе, так як пад напорам такога ветру могуць ламацца дрэвы і падаць дарожныя знакі, піша БелаПАН.

У суботу ўначы магчымыя замаразкі да мінус 1-3 градусаў, днём паветра прагрэецца да плюс 5 па паўночным захадзе і да плюс 15 градусаў па паўднёвым усходзе краіны. У нядзелю цыклон Еў прыйдзе ў Беларусь канчаткова, што будзе суправаджацца мокрым снегам і паніжэннем тэмпературы днём да плюс трох градусаў.

У панядзелак у краіну прыйдзе яшчэ адзін цыклон, але эксперты адзначылі, што ён будзе менш актыўным.

Аднак дрэннае надвор'е прыйдзе ў Беларусь ненадоўга, запэўнілі сіноптыкі і дадалі, што пасля 18 сакавіка тэмпература паветра пачне павышацца.