У «Шарамеццева» затрыманыя 40 украінцаў
13- 15.03.2014, 18:14
- 24,920
Прычыны затрымання невядомыя.
Блізу 40 грамадзян Украіны, якія прыбылі ў Маскву авіярэйсамі з Кіева, Данецка і іншых гарадоў Украіны ў суботу, былі затрыманыя і ім быў забаронены ўезд у Расею. Як паведаміла прэс-служба ўкраінскага МЗС, гэта адбылося ў міжнародным аэрапорце «Шарамеццева», піша «Украінская праўда».
У паведамленні сказана, што кампетэнтнымі органамі РФ было праведзена фатаграфаванне і дактыласкапія ўкраінцаў.
«Ніякага тлумачэння прычын затрымання ні грамадзянам Украіны, ні прадстаўніку Амбасады Украіны ў РФ, які прыбыў на месца падзей, пададзена не было», - заявілі ў МЗС.
У ведамстве нагадалі, што ў апошнія дні былі таксама зафіксаваныя і іншыя падобныя выпадкі. «Такія дзеянні расейскага боку не могуць расцэньвацца інакш, як элемент разгорнутай Крамлём антыўкраінскай істэрыі, закладнікамі якой становяцца ўсё больш грамадзян нашых дзяржаў», - мяркуюць у МЗС.
Украінскія дыпламаты звярнуліся да расейскага боку з патрабаваннем забяспечыць абарону законных правоў і інтарэсаў грамадзян Украіны на сваёй тэрыторыі.