Зніклы ля берагоў В'етнама Boeing шукаюць у 25 краінах

Малайзія афіцыйна звярнулася за міжнароднай дапамогай для пошуку зніклага авіялайнера.

Лік краін, якія былі задзейнічаныя ў пошуках зніклага 7 сакавіка самалёта Boeing кампаніі Malaysia Airlines, павялічыўся з 14 да 25. Пра гэта заявіў у нядзелю міністр транспарту Малайзіі, паведамляе BBC.

Улады Малайзіі папрасілі ЗША, Кітай і Францыю падаць звесткі са спадарожнікаў, якія маглі зафіксаваць сігналы зніклага авіялайнера. На думку начальніка грамадзянскай авіяцыі Малайзіі, Boeing мог перадаваць сігналы на спадарожнік, ужо здзейсніўшы пасадку.

Паліцыя вывучае інфармацыю пра чальцоў экіпажа, усіх 227 пасажыраў і супрацоўнікаў наземных службаў. Пошукі самалёта вядуцца ў двух напрамках - ад мяжы Казахстана і Туркменістана да паўночнага Тайланда і на поўдзень ад Інданэзіі да поўдня Індыйскага акіяна.

Самалёт, які выконваў рэйс MH370 з Куала-Лумпур у Пекін, праляцеўшы над усходнім узбярэжжам Малайзіі, зрабіў круты віраж і, паўторна праляцеўшы над тэрыторыяй паўвыспы, знік у Малакскім праліве. Паводле афіцыйных звестак, на борце зніклага авіялайнера знаходзіліся 227 пасажыраў і яшчэ 12 чальцоў экіпажа.