Амаль КНДР: экзіт-пол у Крыме налічыў 93% «за Расею»
27- 16.03.2014, 21:51
- 42,246
Такія дадзеныя апублікаваў Крымскі рэспубліканскі інстытут палітычных і сацыялагічных даследаванняў.
Апытанне, як запэўніваюць яго ініцыятары, праводзілася на 150 выбарчых участках у Крыме і 50 - у Севастопалі. Паводле стану на 19.30 было апытана 59111 чалавек, піша «Украінская праўда».
Украінцы ў сацыяльных сетках ўжо жартуюць з нагоды такіх лічбаў, параўноўваючы галасаванне ў Крыме з Чачэніяй і КНДР, дзе ў падтрымку дзеючых уладаў «галасуюць» 99-100 адсоткаў выбаршчыкаў.
Крымскія ўлады дазволілі праводзіць апытанне толькі адной арганізацыі, але ніякіх звестак пра такую арганізацыю, як «Крымскі рэспубліканскі інстытут палітычных і сацыялагічных даследаванняў», няма.
Сёння ў Крыме падчас правядзення «рэферэндуму» актывісты зафіксавалі шматлікія парушэнні. Падчас правядзення галасавання стала вядома, што на выбарчых участках выдавалі бюлетэні грамадзянам іншай краіны, а таксама тым, каго няма ў спісах, проста запісваючы жадаючых прагаласаваць ад рукі.
ЦВК Украіны раней заявіў, што любыя мясцовыя «рэферэндумы» на тэрыторыі краіны нелегітымныя. Пра непрызнанне так званага «рэферэндуму» у Крыме заявілі і заходнія палітыкі і эксперты.