Унутраныя войскі Украіны пераведзены на ўзмоцнены рэжым

З мэтай прадухілення тэрарыстычных праяў узмоцненая ахова АЭС і іншых асабліва важных дзяржаб'ектаў.

Прымаючы пад увагу апошнія падзеі ў Крыме, камандаваннем унутраных войскаў МУС Украіны было пастаноўлена аб пераводзе ўнутраных войскаў на ўзмоцнены варыянт нясення службы, паведамляецца на сайце ВВ МУС Украіны.

Як гаворыцца ў паведамленні ведамства, з мэтай прадухілення любых тэрарыстычных праяў, была ўзмоцненая ахова АЭС і іншых асабліва важных дзяржаб'ектаў, якія знаходзяцца пад аховай унутраных войскаў МУС Украіны.

Паводле стану на сёння для забеспячэння бяспекі грамадзян па ўсёй тэрыторыі Украіны да нясення службы па ахове грамадскага парадку прыцягнутая максімальная колькасць асабістага складу ўнутраных войскаў МУС Украіны, піша «Корреспондент».

Дыпламатычныя прадстаўніцтвы і консульскія ўстановы замежных дзяржаў на тэрыторыі Украіны, ахову якіх ажыццяўляюць унутраныя войскі МУС Украіны, зараз ахоўваюцца ва ўзмоцненым рэжыме.

Як вядома, СНБА 1 сакавіка прыняў пастанову аб прывядзенні ў поўную баявую гатоўнасць арміі і правядзенні вучэбных збораў з ваеннаабавязанымі ў неабходнай колькасці. Выконваючы абавязкі прэзідэнта Аляксандр Турчынаў увёў яе ў дзеянне.

Нагадаем, з самай раніцы нядзелі ваенкаматы Украіны пачалі мабілізацыю ваеннаабавязаных мужчын. Пра гэта паведамілі самі добраахвотнікі і супрацоўнікі ваенкаматаў