Паасобны конкурс пры паступленні ў ВНУ і ССНУ адменены

У Беларусі змянілі правілы прыёму ў навучальныя ўстановы.

Лукашэнка 20 сакавіка падпісаў указ № 130 «Аб унясенні змяненняў і дапаўненняў ва ўказ прэзідэнта Рэспублікі Беларусь ад 7 лютага 2006 г. №80», якім зацвердзіў новую рэдакцыю Правілаў прыёму ва ўстановы вышэйшай і сярэдняй спецыяльнай адукацыі. Яна, у прыватнасці, адмяняе паасобны конкурс для выпускнікоў сельскіх і гарадскіх устаноў адукацыі.

Пра гэта паведамляе прэс-служба Лукашэнкі.

«Пры захаванні ўстояных падыходаў да арганізацыі прыёмнай кампаніі, заснаваных на выкарыстанні цэнтралізаванага тэставання, новая рэдакцыя Правілаў прадугледжвае адмену паасобнага конкурсу для выпускнікоў сельскіх і гарадскіх устаноў адукацыі. Акрамя таго, адмяняецца прафесійна-псіхалагічнае сумоўе для асоб, якія паступаюць на спецыяльнасці, звязаныя з дзяржаўным кіраваннем, правам і журналістыкай», - гаворыцца ў паведамленні.

Прадугледжваецца таксама пашырэнне мэтавай падрыхтоўкі па ўсіх спецыяльнасцях. У прыватнасці, дазваляецца заключэнне дамоваў аб мэтавай падрыхтоўцы спецыяліста паміж арганізацыяй-заказчыкам кадраў і абітурыентам незалежна ад месца яго пражывання і адзнак па прадметах уступных выпрабаванняў у дакуменце аб адукацыі. У рамках пашырэння мэтавай падрыхтоўкі павялічваецца таксама прыём абітурыентаў ва ўстановы вышэйшай адукацыі па сельскагаспадарчых спецыяльнасцях да 60% ад кантрольных лічбаў прыёму, па іншых спецыяльнасцях - да 40%; ва ўстановы сярэдняй спецыяльнай адукацыі - па сельскагаспадарчых медыцынскіх спецыяльнасцях да 60% ад кантрольных лічбаў прыёму, па іншых спецыяльнасцях - да 30%.

Прадастаўляецца магчымасць правядзення дадатковага набору ва ўстановы вышэйшай адукацыі па ўсіх спецыяльнасцях на месцы, што засталіся пасля залічэння абітурыентаў вакантнымі, тэрміны і ўмовы якога вызначае Міністэрства адукацыі.

Прадастаўляецца права падачы дакументаў у прыёмныя камісіі ўстаноў адукацыі даверанымі асобамі абітурыентаў», - гаворыцца ў паведамленні.

Уводзіцца шэраг прэферэнцый для абітурыентаў, якія паступаюць ва ўстановы вышэйшай адукацыі на спецыяльнасці сельскагаспадарчага профілю, педагагічныя і ваенныя спецыяльнасці ,а таксама спецыяльнасці фізічнай культуры і спорту.