Расея заняла другое месца ў свеце па колькасці бежанцаў

Пакуль Расея святкуе акупацыю Крыма, яе грамадзяне ўцякаюць на Захад.

Упраўленне Вярхоўнага камісара ААН па справах бежанцаў у пятніцу, 21 сакавіка апублікавала даклад, паводле якога ў 2013 годзе адбыўся рэзкі рост колькасці прашэнняў аб прадастаўленні прытулку ў 44 развітых краінах свету.

Даклад УВКБ ААН "Тэндэнцыі ў сферы пошуку прытулку - 2013" канстатуе, што ў мінулым годзе 612 тысяч 700 чалавек шукалі прытулак у Паўночнай Амерыцы, Еўропе, Усходняй Азіі і Ціхаакіянскім рэгіёне. Гэта найвышэйшы паказчык, пачынаючы з 2001 года. Адлюстраваннем змен у міжнароднай дынаміцы з'яўляецца Афганістан, які на працягу двух гадоў быў асноўнай краінай пошуку прытулку. Цяпер ён зрушыўся на трэцяе месца, прапусціўшы наперад Сірыю і Расейскую Федэрацыю.

Як піша "Зеркало Недели", згодна з дакладам, у 2013 годзе прасілі прытулак 56 тысяч 351 сірыец (25 тысяч 232 у 2012 годзе), 39 тысяч 779 расейцаў (22 тысячы 650 у 2012 годзе) і 38 тысяч 653 афганцаў (47 тысяч 519 чалавек ў 2012 годзе).

Следам ідуць Ірак - 38 тысяч 171 чалавек, Сербія (і Косава згодна Рэзалюцыі Рады Бяспекі ААН 1244 (1999)) - 34 тысячы 660, Пакістан - 26 тысяч 310, Іран - 23 тысячы 879, Самалі - 23 тысячы 71, Эрытрэя - 21 тысяча 837 і Кітай - 20 тысяч 170.

У 2013 годзе найбольшы рост колькасці асоб, якія падалі хадайніцтва аб прадастаўленні прытулку зафіксаваны ў 38 краінах Еўропы, дзе ў сукупнасці было пададзена 484 тысячы 600 хадайніцтваў - на траціну больш, чым у 2012 годзе. У Германіі была пададзеная найбольшая колькасць новых хадайніцтваў - 109 тысяч 600, у Францыі 60 тысяч 100, у Швецыі 54 тысячы 300. Турцыя, найбуйнейшая краіна ў Еўропе з пункту гледжання ліку хадайніцтваў, пададзеных з прычыны сірыйскага крызісу (на 18 сакавіка зарэгістраваны лік бежанцаў складае 640 тысяч 889 чалавек), у 2013 годзе таксама прыняла 44 тысячы 800 хадайніцтваў аб прадастаўленні прытулку, у асноўным ад выхадцаў з Ірака і Афганістана, Італія - 27 тысяч 800 хадайніцтваў, Грэцыя - 8 тысяч 200.

Паўночная Амерыка стаіць на другім месцы па ліку хадайніцтваў аб прадастаўленні прытулку - амаль 98 тысяч 800. У Канадзе, дзе нядаўна адбыліся змены ў міграцыйнай палітыцы, было пададзена 10 тысяч 400 хадайніцтваў - удвая менш, чым у 2012 (20 тысяч 500). ЗША (88 тысяч 400 хадайніцтваў) даўно з'яўляецца вядучай краінай прытулку сярод прамыслова развітых краін, і ў 2013 годзе ўступіла толькі Германіі па колькасці пададзеных хадайніцтваў.

Ва Усходняй Азіі і Ціхаакіянскім рэгіёне, Японіі (3 тысячы 300) і Рэспубліцы Карэя (1 тысяча 600) была пададзеная рэкордная колькасць хадайніцтваў аб прадастаўленні прытулку ў параўнанні з мінулымі гадамі. У Аўстраліі таксама адзначаны значны рост колькасці хадайніцтваў (24 тысячы 300) у параўнанні з 2012 годам (15 тысяч 800), што ставіць яе амаль на адзін узровень з Італіяй.

Асобы, якія шукаюць прытулак у прамыслова развітых краінах, праходзяць індывідуальную працэдуру вызначэння статусу бежанца. Адпаведна, іх колькасць заўсёды вышэй, чым колькасць тых, хто ў канчатковым выніку прызнаецца бежанцамі. Сярод 44 прамыслова развітых краін, згаданых у дакладзе "Тэндэнцыі ў сферы пошуку прытулку", узровень прызнання шырока вар'іруецца і з'яўляецца больш высокім сярод тых, хто ратуецца ад канфлікту. Напрыклад, узровень прызнання асоб з Сірыі, Эрытрэі, Ірака, Самалі і Афганістана вагаецца паміж 62% і 95%. Узровень прызнання грамадзян Расейскай Федэрацыі і Сербіі (і Косава згодна Рэзалюцыі Рады Бяспекі ААН 1244 (1999)) значна ніжэй - адпаведна ад 28% да 5%.

Фота: Getty Images