У Беларусі алкагольная катастрофа: злоўжывае кожны 10-ы

У краіне на душу насельніцтва, уключаючы немаўлятаў і старых, прыходзіцца 15 літраў чыстага алкаголю.

Святары, нарколагі і прадстаўнікі грамадскіх арганізацый і праваахоўных органаў заяўляюць пра неабходнасць кансалідацыі намаганняў у барацьбе з распаўсюджваннем п'янства і алкагалізму ў Беларусі. Па дадзеных экспертаў, у краіне на душу насельніцтва, уключаючы немаўлятаў і старых, прыходзіцца 15 літраў чыстага алкаголю, піша "Інтэрфакс".

Кожны 10-ы

Удзельнікі форуму "Алкагольная катастрофа ў Беларусі" прынялі рэзалюцыю з заклікам аб неабходнасці кансалідацыі намаганняў дзяржавы, канфесій, медыкаў і праваахоўных органаў з мэтай спыніць масавую алкагалізацыю насельніцтва рэспублікі.

Як паведаміў агенцтву кіраўнік каардынацыйнага цэнтра Беларускай праваслаўнай царквы па супрацьдзеянні наркаманіі і алкагалізму настаяцель парафіі іконы Божай Маці "Неўпівальная Чара" протаіерэй Дыянісій Пясецкі, "настаў час аб'яднаць сілы дзяржаўных арганізацый, грамадскіх аб'яднанняў, рэлігійных супольнасцяў, шырокіх слаёў грамадства, інакш беларускую нацыю чакае дэградацыя і выміранне".

"Паводле экспертных ацэнак, у цяперашні час каля 1 мільёна чалавек у Беларусі злоўжываюць моцнымі напоямі, 263 тысячы беларусаў стаяць на ўліку ў наркалагічных дыспансерах, імкліва расце жаночы алкагалізм", - адзначыў святар.

Адной з прычын павелічэння алкагалізацыі насельніцтва ён назваў прапаганду алкаголю ў СМІ "і асабліва на тэлебачанні - у рэкламе піва, шкоднасных праграмах па культывацыі так званага "культурнага піцця".

"Наадварот, неабходна мабілізаваць дзяржаўныя і грамадскія сілы Беларусі для распрацоўкі праграмы мерапрыемстваў, мэтай якіх стане фармаванне ў Беларусі здаровага, цвярозага грамадства", - перакананы святар.

П'юць мацней, чым у савецкія часы

Эксперты, якія ўзялі ўдзел у форуме "Алкагольная катастрофа ў Беларусі", адзначылі, што "ў краіне створаныя спрыяльныя ўмовы для продажу алкаголю". "Даступнасць і таннасць алкагольнай прадукцыі перасягнула ўсе ранейшыя формы продажу ў савецкі і постсавецкі час", - падкрэслілі яны.

"У цяперашні час у рэспубліцы ўжыванне алкаголю ў разліку на душу насельніцтва дасягнула 15 літраў чыстага алкаголю пры крытычным узроўні ўжывання, роўным 8 літрам", - канстатавалі эксперты. Усё гэта, па іх словах, "прывяло да хуткага павелічэння колькасці заўчасных смерцяў, росту злачыннасці, дарожна-транспартных здарэнняў і іншых негатыўных з'яў".

Эксперты таксама звярнулі ўвагу на тое, што "праблемай апошніх гадоў у краіне стала шырокае распаўсюджванне ўжывання алкаголю сярод маладога пакалення беларусаў". "Стала ўжо практычна нормай, што непаўналетнія пачынаюць алкагольнае дарослае жыццё ў сярэдніх класах. Гэта не келіх шампанскага на выпускным вечары, як было ў савецкія часы", - адзначылі яны.

Акрамя спецыялісты назвалі "вельмі сур'ёзнай і катастрафічнай тэндэнцыю павелічэння колькасці жанчын, якія п'юць". "Праблема жаночага алкагалізму ў Беларусі патрабуе сур'ёзнага вывучэння, аналізу і збаўчых мер", - перакананыя яны.

Паводле экспертных ацэнак, у Беларусі расходы дзяржавы, звязаныя са спажываннем алкаголю насельніцтвам, з улікам сацыяльнай шкоды перавышаюць прыбытак ад продажу спіртных напояў прыблізна ў 8 разоў.

Беднасць, дэпрэсіі і сваркі

Сацыёлагі адзначаюць, што на рост алкагалізацыі ў беларускім грамадстве ўплывае комплекс прычын, сярод якіх нягоды паўсядзённага жыцця, нізкі ўзровень жыцця, сямейная бязладзіца.

Як паведамілі агенцтву ў Інстытуце сацыялогіі Нацыянальнай акадэміі навук Беларусі, "на распаўсюджанасць п'янства і алкагалізму ў краіне асноўны ўплыў аказваюць нізкі ўзровень жыцця насельніцтва (43,5%), адсутнасць цікавых заняткаў у вольны час (38,3%), няправільнае выхаванне ў сям'і (37,5%)".

Паводле дадзеных даследавання культуры піцця ў краіне, наступныя 5 прычын распаўсюджанасці празмернага ўжывання спіртнога - гэта "нягоды паўсядзённага жыцця (36,4 %), "піцейныя" традыцыі і звычаі (34,8%), даступнасць набыцця спіртных напояў (34,3%), вялікі аб'ём вытворчасці і продажу спіртных напояў (25,7%), сямейныя сваркі і канфлікты (26,3%)", паведамілі ў інстытуце.

Не апошняе месца ў фармаванні "алкагольных" паводзінаў, па дадзеных сацыёлагаў, займае "шырокая рэклама спіртных напояў на тэлебачанні і іншых СМІ (22,2%), нізкія кошты на спіртныя напоі (19,1%), неэфектыўная антыалкагольная палітыка дзяржавы (17,6%)", падкрэслілі сацыёлагі.

Дайце грошай на лячэнне

Галоўны нарколаг Менска Сяргей Малочка лічыць, што ў Беларусі трэба частку грошай ад рэалізацыі спіртных напояў пускаць на прафілактыку і лячэнне алкагольнай залежнасці.

"Мы неаднаразова выступалі з прапановай - вылучыце 0,1% кошту алкагольных напояў і накіруйце на праграмы барацьбы з алкагалізмам. Атрыманая такім чынам сума ў Менску складзе амаль Br25 млрд у год", - выказаў сваё меркаванне Малочка.

"Гэтыя немалыя грошы можна будзе накіраваць не толькі ў наркалагічныя дыспансеры, але і навуковыя даследаванні ў гэтай сферы, прафілактычныя кампаніі, сацыяльную рэкламу", - працягнуў нарколаг.

Паводле прыведзеных ім дадзеных, у Менску больш за 10% тавараабароту складае абарот алкагольнай прадукцыі, а 7% даходнай часткі бюджэту сталіцы фармуецца за кошт продажаў алкаголю.

Спажыванне алкаголю ў Менску на душу насельніцтва павялічылася ў параўнанні з 1995 годам амаль у 2 разы, адзначыў Малочка.

У цяперашні час у Беларусі на наркалагічным дыспансерным уліку стаіць каля 180 тыс. чалавек, з іх 55 тыс. - непаўналетнія, якія пакутуюць ад алкагольнай залежнасці. Пры гэтым нарколагі заяўляюць, што рэальную колькасць грамадзян, якія пакутуюць ад алкагольнай залежнасці можна вылічыць, калі памножыць гэтую лічбу на 8-10.