Памёр 25-гадовы лідар гурта «Napoli» Ілля Краўчук

26 сакавіка на 25 годзе жыцця памёр лідар беларускага гурта «Napoli» Ілля Краўчук.

Пра гэта гаворыцца на афіцыйнай старонцы гурта «Napoli». Прадзюсер спевака Аляксандр Слуцкі распавёў «Салідарнасці», што адбылося гэта ў выніку няшчаснага выпадку ў ноч з суботы на нядзелю. Ілля няўдала ўпаў на спіну і стукнуўся галавой. З цяжкай траўмай яго даставілі ў бальніцу, дзе ён памёр.

Па словах Аляксандра, развітанне і пахаванне Іллі Краўчука пройдуць 27 сакавіка, у сераду, у Дзяржынску. Пачатак пахавання ў 13.00.

Па неафіцыйнай інфармацыі, Ілля атрымаў смяротную траўму ў выніку сутычкі ў адным з бараў горада.

На сцяне афіцыйнай старонкі групы «Вконтакте» напісана:

«Немагчыма да канца паверыць, што цябе больш з намі няма. Увесь гэты час ты быў нашым натхняльнікам, бясконца таленавітым аўтарам і выдатным сябрам. Ты назаўсёды застанешся ў нашых сэрцах як добры і шчыры чалавек. Ты будзеш жыць у нашай памяці і ў памяці ўсіх людзей, якія цябе любяць. Ты будзеш жыць у тых песнях, якія напісаў і якія мы выконвалі разам з табой. Перад вачыма стаіць толькі твая шчаслівая ўсмешка. Мы выказваем словы падтрымкі тваім бацькам, родным, братам, сёстрам, тваёй жонцы і маленькаму сыну, усім тваім сябрам, усім, хто цябе ведаў і любіў. Ілля, ты пакінуў нам частку сваёй душы. Тваю музыку будуць слухаць. Твае песні будуць спяваць. Ты будзеш жыць у нашых сэрцах. Хай там на нябёсах Табе будзе цёпла. Ілля! Мы любім цябе і смуткуем».

Гурт «Napoli» быў заснаваны ў 2012 годзе. За гэты час калектывам былі запісаныя восем песень. Гурт паспеў выступіць на «Славянскім базары» і шэрагу іншых афіцыйных мерапрыемстваў. У 2014 годзе «Napoli» трапіў у фінал адборачнага конкурсу песні «Еўрабачанне 2014».