Акупанты збілі ўкраінскіх курсантаў у Севастопалі

Курсантаў падвяргаюць здзекам, ёсць асобныя выпадкі збіцця.

Пра гэта заявіў намеснік міністра Мінабароны Украіны Леанід Палякоў.

Міністэрства абароны заяўляе, што валодае фактамі нанясення пабояў расейскімі вайскоўцамі ўкраінскім курсантам Акадэміі Ваенна-марскіх сіл у Севастопалі, паведаміў у сераду, 26 сакавіка, на брыфінгу намеснік міністра Леанід Палякоў.

"Да іх ставяцца так жа, як і да нашых частак і падраздзяленняў, - падвяргаюць здзекам, ёсць асобныя выпадкі збіцця", - цытуе яго словы інфармагенцтва Українські новини.

Акрамя таго, па словах Палякова, не выключаныя выпадкі рабаванняў, у тым ліку і мабільных тэлефонаў курсантаў. На дадзены момант усе курсанты знаходзяцца на тэрыторыі Акадэміі ВМС і чакаюць перадыслакацыі на мацерыковую частку Украіны, дзе яны, хутчэй за ўсё, працягнуць навучанне ў Адэсе.

Пры гэтым Мінабароны настойвае на тым, каб у іх перадыслакацыі Украіне дапамагаў камісар Арганізацыі Аб'яднаных Нацый па правах дзяцей і прадстаўнікі Чырвонага Крыжа.

Раней намеснік міністра абароны Украіны Леанід Палякоў заяўляў, што шэсць украінскіх камандзіраў знаходзяцца ў палоне ў расейскіх. Па словах намесніка міністра, усе палонныя - афіцэры, сярод іх адзін генерал. Мінабароны дакладна не вядома іх месцазнаходжанне, ёсць толькі версіі.