НАТА ўзмоцніць сухапутныя і марскія войскі ў Польшчы і краінах Балтыі
3- 27.03.2014, 12:21
- 8,936
У адказ на расейскую агрэсію ЗША і іншыя краіны Альянсу яшчэ больш узмоцняць ваенную прысутнасць ва Усходняй Еўропе.
Пра гэта паведаміў журналістам дарадца прэзідэнта ЗША па нацыянальнай бяспецы Бэн Родс, перадае PAP (пераклад - charter97.org).
- Мы будзем нарошчваць нашы сухапутныя і марскія сілы ў краінах НАТА як дадатак да сваіх ВПС, - заявіў ён.
Родс дадаў, што гаворка ідзе таксама аб адпраўцы дадатковага абсталявання і ваеннага персаналу, але не ўдакладніў колькасць. Ён растлумачыў, што дэталі плана будуць вызначаныя на пасяджэнні міністраў замежных спраў краін НАТА на наступным тыдні ў Брусэлі.
- Мы спадзяемся, што да нас далучацца іншыя еўрапейскія саюзнікі па НАТА, - сказаў ён.
Палітык дадаў, што гэта было прадметам учорашняй размовы Барака Абамы з генеральным сакратаром НАТА Андэрсам Фогам Расмусэнам.
Родс адмовіўся назваць поўны спіс краін, у якія павінны быць адпраўленыя дадатковыя сілы, але падкрэсліў, што ў цэнтры ўвагі ЗША з самага пачатку ўкраінскага крызісу «Польшча, Эстонія, Літва і Латвія».