Аэрапорт Шарамеццева дазволіў правозіць вадкасці ў ручной паклажы

З 27 сакавіка расейскі аэрапорт зноў дазволіў пасажырам правозіць вадкасці на борце самалёта.

"З сённяшняга дня Шарамеццева здымае забарону на правоз вадкасцяў, выкліканую дырэктывай Расавіяцыі ад 08.01.2014 года", - гаворыцца на афіцыйнай старонцы аэрапорта ў "Твітэры".

Раней забарону адмяніў пецярбургскі аэрапорт Пулкава, а таксама паветраныя гавані Омска і Томска. У іншых авіяцыйных вузлах абмежаванні да гэтага часу дзейнічаюць. Расавіяцыя ўводзіла забарону ў мэтах бяспекі на перыяд падрыхтоўкі і правядзення XXII Алімпійскіх гульняў і XI Паралімпійскіх гульняў 2014 года, перадае РБК.

У студзені Растранснагляду было даручана забяспечыць кантроль выканання суб'ектамі транспартнай інфраструктуры і авіякампаніямі дадатковых мер бяспекі ў адносінах да перадпалётнага надгляду пасажыраў. На працягу амаль трох месяцаў пасажыры маглі правозіць толькі ёмістасці з вадкасцямі, гелямі, аэразолямі, крэмамі і пастамі, набытымі ў зоне Duty Free. Усе пакупкі павінны былі быць апламбаваныя ў празрысты пакет, "які забяспечвае ідэнтыфікацыю яго змесціва".

На борт забаранялася правозіць любыя ёмістасці (з вадкасцямі, у тым ліку менш за 100 мл, за выключэннем лекаў, спецыяльных дыетычных патрэбаў, дзіцячага харчавання, якія "не забараняліся і дапускаліся да правозу ў ручной паклажы пасля іх ідэнтыфікацыі службамі авіяцыйнай бяспекі аэрапорта і праходжання праверкі бяспекі з выкарыстаннем тэхнічных сродкаў дагляду і выяўлення выбуховых рэчываў".

Нагадаем, на перыяд Алімпіяды аналагічную забарону ўвялі амерыканскія ўлады: яны часова забаранілі правоз любых вадкасцяў, геляў і аэразоляў у ручной паклажы на рэйсах паміж ЗША і Расеяй. Пасажыры, якія адпраўляліся ў Расею з ЗША, павінны былі асабіста зарэгістравацца на рэйс у прадстаўніка авіякампаніі і не маглі скарыстацца паслугамі мабільнай і анлайн-рэгістрацыі.

Незадоўга да гэтага раней амерыканскія і міжнародныя авіякампаніі, якія выконваюць рэйсы з ЗША ў Сочы, атрымалі прадпісанне правяраць цюбікі з зубной пастай. Па меркаванні амерыканскіх спецслужбаў, у іх маглі знаходзіцца матэрыялы, каб зрабіць выбухоўку.