Яўген Марчук: Бліжэйшыя два дні будуць самымі складанымі для Украіны

Былы міністр абароны Украіны заяўляе, што ў бліжэйшыя два дні краіна будзе перажываць самы крытычны момант сваёй гісторыі.

Пра гэта Яўген Марчук сказаў на прэс-канферэнцыі ва Украінскім крызісным медыя-цэнтры, перадае УНІАН.

Ён адзначыў, што сітуацыя пераходзіць у другую фазу спецаперацыі, якую праводзіць Расея ў дачыненні да Украіны, і гэтая фаза можа быць нашмат больш небяспечнай, чым была «крымская фаза».

«На сённяшні дзень для экспертаў, якія не ўваходзяць ва ўладныя структуры і добра разумеюць у фармаце абароннай бяспекі, нацыянальнай і дзяржаўнай бяспекі, у цэлым відаць, што дзесьці ў бліжэйшыя два дні Украіна будзе перажываць самы крытычны момант сваёй гісторыі за ўсе гады Незалежнасці», - сказаў Марчук.

Па словах Марчука, для вайскоўцаў ёсць вельмі «дакладныя індыкатары», калі рыхтуецца маштабная аперацыя, асабліва наступальнага характару, якую немагчыма схаваць.

«Ёсць такія аперацыі, такія іх складнікі, на такім этапе, калі доўга трымаць немагчыма. Трэба або даваць адбой, або рэалізацыя наперад», - патлумачыў ён.

Марчук паведаміў, што на сённяшні дзень у Данецку і вакол гэтага горада назіраецца навала так званых «турыстаў» у грамадзянскім і назіраецца іх «арганізацыйная актыўнасць».

«Ёсць усе прыкметы таго, што, на вялікі жаль, можа адбыцца спачатку не масіраваная атака наступальнага характару расейскіх рэгулярных войскаў на тэрыторыю Украіны, а будзе ініцыяваная вельмі пісьменна, а яны ўжо атрымалі вопыт у Крыме, з улікам усіх памылак... Гэта будзе вялікая частка арганізаваных людзей, якія не будуць у ваеннай форме зусім, але значная частка з іх будзе ўзброеная аўтаматычнай зброяй. Ну, а далей - адпаведныя дзеянні», - сказаў Марчук.

Акрамя таго, па словах Марчука, на думку экспертаў, расейскую інтэрвенцыю ў Крым можна было заблакаваць без стральбы. «На сённяшні дзень магу сказаць толькі адно на экспертным узроўні, што інтэрвенцыю ў Крым можна было заблакаваць без узаемнай рознай стральбы, танкаў і авіяцыі», - адзначыў ён.

Нагадаем, ваенная выведка ЗША апавясціла Кангрэс аб тым, што верагоднасць ваеннага ўварвання Расеі на тэрыторыю ўсходняй Украіны вышэй, чым думалі да гэтага часу.

Па дадзеных амерыканскай выведкі, у раёнах Растова-на-Доне, Курска і Белгарада сканцэнтраваная групоўка колькасцю больш за 30,000 салдат, пераважна ў складзе матарызаваных падраздзяленняў, прызначаных для хуткіх кідкоў.

24 сакавіка на паўднёвым захадзе Бранскай вобласці была заўважаная тэхніка 12 танкавага палка 4-й гвардзейскай Кантэміраўскай танкавай дывізіі (эліта расейскіх сухапутных войскаў, рэгулярна ўдзельнічае ў парадах на Краснай плошчы).

Гэта злучэнне адгрузілася ў раёне Новозібкі-Клімава і, хутчэй за ўсё, гатова наступаць праз Чарнігаў наўпрост на сталіцу Украіны.