Грузія плануе вярнуць Абхазію і Паўднёвую Асецію

Тбілісі разглядае Абхазію і Паўднёвую Асецію як сваю тэрыторыю і не мае намеру мірыцца з іх акупацыяй Расеяй.

Пра гэта заявіла кіраўніца грузінскага МЗС Мая Панджыкідзэ. Са слоў міністра, Грузія ніколі не змірыцца з тым, што 20% яе тэрыторыі акупаваныя Расеяй, паведамляе Deutsche Welle.

Абхазію і Паўднёвую Асецію Панджыкідзэ назвала двума рэгіёнамі, якія "не з'яўляюцца незалежнымі, але абвясцілі сябе незалежнымі, акрамя таго, там дыслакаваныя расейскія войскі".

Таксама яна адзначыла, што Грузія мае намер як мага хутчэй укласці пагадненне аб асацыяцыі з Еўразвязам, рушыўшы ўслед прыкладу Украіны.

"Еўразвяз таксама вельмі зацікаўлены ў тым, каб падпісаць з намі такое пагадненне, - сказала Панджыкідзэ. - У гэтым пытанні мы адзіныя: чым хутчэй, тым лепш".